Google раҳбари сунъий интеллект «пуфаги» ёрилишидан огоҳлантирди
Сундар Пичайга кўра, сунъий интеллект бозоридаги эҳтимолий «портлаш» ҳаммага таъсир қилади ва Google ҳам ундан суғурталанмаган.
Alphabet ширкати (Google’нинг она компанияси) бош директори Сундар Пичай сунъий интеллект (СИ) технологияларига бўлган орттиқча ҳавас бозордаги хавфли «пуфак»ка айланганини таъкидлади. Унинг айтишича, агар бу «пуфак» ёрилса, оқибатдан ҳеч бир компания, жумладан Google ҳам эсон-омон чиқа олмайди.
BBC’га берган интервюсида Пичай ҳозирги СИ инвестиция бумида иррационал элементлар борлигини тан олди. Ушбу ҳолатни 1990-йиллар охиридаги интернет-бум билан таққослаб, «ўшанда ҳам ортиқча сармоя киритилган, аммо интернет муҳим янгилик бўлганини ҳеч ким инкор қилмайди», деди у.
Google ўтган етти ойда ўз капитализациясини икки бараварга ошириб, 3,5 трлн долларга етказди. Бу OpenAI билан рақобатда кучайган ишонч туфайли рўй берди. Nvidia эса 5 трлн доллар билан тарихий рекорд ўрнатди.
Пичайга кўра, Google’нинг афзаллиги шундаки, у тўлиқ технологик занжирга эга: ўз чиплари, дата-марказлари, YouTube каби платформалари орқали ҳар қандай тебранишларга тайёр.
Бироқ у энергия масаласига ҳам алоҳида эътибор қаратди. Халқаро энергетика агентлиги маълумотига кўра, СИ 2023 йилда бутун жаҳон электр энергиясининг 1,5 фоизини сарфлаган. Бу Google’нинг 2030 йилгача нол углерод чиқиндиси мақсадига халақит бериши мумкин.
Шу билан бирга, компания Британиядаги СИ инфратузилмаси ва тадқиқотларига 5 млрд фунт стерлинг сармоя киритиш режаларини тасдиқлади. Ушбу маблағ DeepMind’нинг Лондондаги фаолиятини ҳам кенгайтиришга йўналтирилади.
