Ички валюта бозорида талаб 42,7 миллиард долларга етди
2025 йил январ–сентябр ойларида хорижий валютага талаб 42,7 миллиард долларга, таклиф эса 34,4 миллиард долларга етди. Миллий валюта сўм 6,4 фоизга мустаҳкамланиб, ички бозорда барқарорлик сақланмоқда.
Ўзбекистон ички валюта бозори 2025 йилнинг тўққиз ойида фаол ўсишни намоён этди. Марказий банк маълумотларига кўра, хорижий валютага бўлган умумий талаб 42,7 миллиард долларга етган бўлиб, ўтган йилнинг шу даврига нисбатан 23,5 фоизга ошган. Валюта таклифи эса Марказий банк операцияларини ҳисобга олмаганда 34,4 миллиард долларни ташкил этиб, 24 фоизга ўсган.
Бозордаги валюта таклифи асосан экспорт тушумлари, хорижий кредитлар ва пул ўтказмалари ҳисобига таъминланди. Экспортдан келган валютанинг 55 фоизи ички бозорда сотилган, бу ўтган йилга нисбатан 22 фоизга кўп. Шу билан бирга, банклар томонидан хорижий кредитлар ҳисобидан 6,3 миллиард доллар сотилган — 2024 йилга нисбатан 61 фоизга кўп.
Жисмоний шахслар ҳам ички валюта айирбошлашда фаол иштирок этган. Аҳоли 15,2 миллиард доллар сотиб, 8,5 миллиард доллар харид қилган. Натижада жисмоний шахслар операцияларида 6,7 миллиард долларлик ижобий сальдо қайд этилган. Бу асосан хориждан келаётган пул ўтказмалари ҳажмининг 24 фоизга ўсиши билан изоҳланади.
Январ–сентябр ойларида миллий валюта сўмнинг курс динамикаси ҳам ижобий бўлди. Сўм йил бошидан бери 6,4 фоизга мустаҳкамланди, унинг кунлик тебаранувчанлиги икки баробарга ошиб, ривожланаётган давлатлар даражасига яқинлашди. Асосий савдо ҳамкорлар валюталари — рубл, юан ва вон — долларга нисбатан мустаҳкамланишига қарамасдан, сўмнинг реал эффектив курси 1,5 фоизга қадрсизланиб, рақобатбардошликни сақлаб қолди.
Марказий банк маълумотларига кўра, сўм мустаҳкамланиши натижасида аҳоли ва тадбиркорлар томонидан миллий валютадаги депозитлар 23 фоизга ошиб, 205 триллион сўмга етди. Шунингдек, инфляция кутилмалари 12 фоизгача пасайди, кредит ва депозитлардаги долларлашув даражаси сезиларли камайди.
