Исломбек Исмоилов «Нефтчи» ПФКга бош мураббий бўлди
Ўзбекистон U-17 термасини қитъа чемпиони қилган ва жаҳон мусобақасида юқори натижага олиб чиққан Исломбек Исмоилов «Нефтчи» ПФКга бош мураббий бўлди
Марғилонда туғилган Исломбек Исмоилов ёш бўлишига қарамай, миллий футболимизда эришган ютуқлари билан эътибор қозонган мутахассис сифатида танилади. У бошқарган U-17 терма жамоаси замонавий услуб, қатъий интизом ва барқарор ўйини билан Осиё чемпионига айланган, шунингдек, Жаҳон чемпионатида ҳам муносиб иштирок этган эди.
«Нефтчи» ПФК расман эълон қилган бу тайинлов клубнинг келгуси мавсум олдидан муҳим қадами сифатида баҳоланмоқда. Навбатдаги вазифалар жамоа учун катта масъулият юклайди. Клуб чемпионлик мавқеини сақлаб қолиш билан бирга, ички рақобатни кучайтириш ва ўйин сифатида барқарор ривожланишга эришишни мақсад қилган.
Шу билан бирга, «Нефтчи»нинг Осиё Чемпионлар Лигаси элит босқичида муносиб натижага эришиши устувор йўналиш сифатида қайд этилмоқда. .
Аввалроқ Исломбек Исмоилов Қатардаги U17 Жаҳон чемпионати 1/8 финалида Италияга 2:3 ҳисобидаги мағлубиятдан сўнг тўғридан-тўғри мухлисларга мурожаат қилиб, жамоа билан йўли расман тугаганини билдирган эди.
