IT Park Ventures Ayan Capital’ga 1 mln dollar sarmoya kiritdi
Jalb qilingan mablag‘lar kompaniyaning sun’iy intellektga asoslangan moliyaviy yechimlarini rivojlantirish va O‘zbekistondagi dasturchilar jamoasini kengaytirishga yo‘naltiriladi.
© Фото: IT Park VenturesIT Park Ventures investitsiya jamg‘armasi Buyuk Britaniyaning Ayan Capital islomiy fintex-startapiga 1 million dollar miqdorida sarmoya kiritganini ma’lum qildi. Bu mablag‘ 4 million dollarlik investitsiya raundining bir qismi bo‘lib, unda Britaniya va Shveysariyadan kelgan xalqaro investorlar ham ishtirok etgan.
Ma’lum qilinishicha, jalb etilgan kapital kompaniya faoliyatini kengaytirish, texnologik yechimlarni rivojlantirish va jamoani kengaytirishga yo‘naltiriladi. Xususan, 1 million dollarlik sarmoya kompaniyaning texnologik ekotizimini mustahkamlash, avtomatik skoring va avtokreditlash jarayonlari uchun sun’iy intellekt (AI) yechimlarini ishlab chiqish, shuningdek, O‘zbekistondagi dasturchilar jamoasini kengaytirishga sarflanishi rejalashtirilgan.
IT Park Ventures direktori Dalerxon Nodirovning ta’kidlashicha, Ayan Capital asoschilari Markaziy Osiyodagi eng yirik fintex bizneslaridan birini barpo etishga muvaffaq bo‘lgan.
«Endilikda ular Buyuk Britaniyada yangi avlod islomiy raqamli bankni qurishga kirishishgan. IT Park Ventures’ning ustuvor yo‘nalishlaridan biri — global bozorlarda faoliyat yuritayotgan va shu bilan birga O‘zbekistonda kuchli jamoalar shakllantirayotgan startaplarni qo‘llab-quvvatlashdir», — dedi Nodirov.
VAQT.UZ avvalroq IT Park Ventures o‘z kapitalini 10 million dollardan 30 million dollargacha oshirgani haqida xabar bergandi. Bu orqali jamg‘arma 3 million dollargacha bo‘lgan investitsiya takliflarini ko‘rib chiqish imkoniyatiga ega bo‘lgan.
Shu bilan birga, 2030 yilga qadar O‘zbekistonda 5000 ta startap, 2 milliard dollarlik venchur investitsiya hamda bahosi 100 million dollardan oshadigan 25 ta startap yaratish rejalashtirilmoqda.
Ma’lumotlarga ko‘ra, 2026 yilning yanvar–mart oylarida 10 ta venchur fond jami 24 ta startapga 148,6 million dollar investitsiya kiritgan. Ushbu bitimlardan 16 tasi mahalliy startaplarga, qolganlari esa xorij bozorlarida faoliyat yuritayotgan kompaniyalarga to‘g‘ri kelgan.
Ayan Capital haqida
Ayan Capital Buyuk Britaniyada islomiy moliyaviy xizmatlar uchun to‘liq raqamli ekotizimni rivojlantirmoqda. Startap seriyali tadbirkorlar Abdullo Qurbonov, Firdavs Mirzoyev va Zuhursho Rahmatulloyev tomonidan tashkil etilgan. Ular avval Alif platformasiga ham asos solgan.
Kompaniya bugungi kunda jismoniy shaxslar, tadbirkorlar va biznes uchun to‘liq raqamli «halol» avtomobil moliyalashtirish xizmatlarini taklif etadi.
2025 yil O‘zbekistonda yangi venchur fondlari soni bo‘yicha rekord yil bo‘ldi. Bozorda «Yoshlar Ventures», «X-Togo», «United Ventures», «SQB Ventures», «Imkon Ventures», «Sarmo Ventures» va «Asaka Pharm Ventures» kabi yettita yangi jamg‘arma faoliyat boshladi.
