Кремл: Путин–Уиткофф музокаралари натижасиз тугади
Кремлдаги беш соатлик музокаралардан сўнг Россия Украина бўйича АҚШ билан ҳеч қандай келишувга келинмаганини маълум қилди, аммо мулоқот давом этишини билдирди.
Кремл Украина бўйича музокараларда ҳозирча келишилган «муроса» йўқлигини маълум қилди. Бу ҳақда Россия президенти ёрдамчиси Юрий Ушаков Владимир Путин ва АҚШ президенти Доналд Трампнинг махсус вакили Стивен Уиткофф ўртасидаги беш соатлик учрашувдан кейин айтди. Унинг сўзларига кўра, АҚШ таклиф қилган айрим ғояларни Россия томонидан қабул қилинади, баъзилари эса «мутлақо мос келмайди».
Ушаковнинг таъкидлашича, икки томон музокара мазмунини ошкор қилмасликка келишиб олган. Шу билан бирга, Путин Уиткофф орқали Доналд Трампга «дўстона салом» йўллагани айтилди. Россия тарафи музокаралар конструктив руҳда ўтганини, аммо жиддий келишувга ҳали эрта эканини билдирмоқда.
CNN манбаларига кўра, Американинг юқори мартабали делегацияси Стивен Уиткофф ва Доналд Трампнинг куёви Жаред Кушнер ҳам иштирок этган гуруҳ Кремлда анча вақт кутиб қолган. Айтилишича, делегация бир неча километр узоқликда ўтаётган иқтисодий форумда чиқиш қилаётган Путинни нутқи тугагунча залда уч соат кутишга мажбур бўлган.
Ушаков музокараларда Россия томони АҚШ таклиф қилган айрим бандлар бўйича кескин эътирозларини билдирганини тасдиқлади. Америкаликлар ўз навбатида бу ҳақда Вашингтонга ҳисоб беради. Россия расмийсига кўра, музокаралар қўшимча таҳлил ва қўшимча алоқаларни талаб қилади.
Учрашув якунида Кремл ҳеч қандай баёнот бермади. Уиткофф ва Кушнер тўғридан тўғри АҚШнинг Москвадаги элчихонасига йўл олган. Томонлар музокара жараёни давом этишини ва қўшимча мулоқотлар бўлишини билдирмоқда.
