Кремл россияликларни нархлар ошишидан қўрқмасликка чақирди

Россия президенти матбуот котиби Дмитрий Песков россиянлар нархлар кескин ошишидан хавотир олмаслиги кераклигини билдирди. Унинг айтишича, ҳукумат ва регуляторлар вазиятни доимий назорат қилиб бормоқда. Песковнинг сўзларига кўра, Россия Марказий банки макроиқтисодий барқарорликни сақлаш учун зарур чораларни кўрмоқда, ҳукумат эса нархлар ўсишини таҳлил қиляпти.

Бу баёнот 2026 йил бошида инфляция кескин тезлашган бир пайтда янгради. Расмийлар ҳозирча хавотир учун асос йўқлигини таъкидламоқда.

Инфляция даражаси кўтарилди

Росстат маълумотларига кўра, 1–12 январ кунлари истеъмол нархлари 1,26 фоизга ошган. Бу кўрсаткич ўтган 2025 йилнинг бутун январ ойидаги ўсишдан ҳам юқори бўлди. Инфляция суръатлари 2022 йил март ойидан бери энг юқори даражада қайд этилди.

Россия Иқтисодий ривожланиш вазирлиги бу ҳолатни ҚҚС ставкасининг 20 фоиздан 22 фоизга оширилиши билан изоҳлади. Натижада озиқ-овқат товарлари ўртача 1,4 фоизга, ноозиқ-овқат товарлари 0,74 фоизга, хизматлар эса 1,8 фоизга қимматлашди. Шунингдек, автомобил утилизация йиғими, ёқилғи акцизлари ҳамда коммунал ва транспорт тарифлари индексацияси нархларга босим қилди.

Россия Савдо-саноат палатаси раҳбари Сергей Катириннинг айтишича, йил бошида логистика хизматлари 10–20 фоизга қимматлаган.

«Ҳаммаси назорат остида»

Айни пайтда жамоатчилик ижтимоий тармоқларда нархлар ошишига муносабат билдирмоқда: айрим шаҳарларда оддий товарлар қимматлашиб, дўконларда ҳимоя қутиларига жойланмоқда.

Шунга қарамай, Марказий банк инфляция бўйича прогнозини ўзгартирмади ва 2026 йил охиригача 4–5 фоизлик диапазонни кутмоқда.

РФ президенти Владимир Путин эса инфляцияни пасайтириш ва иқтисодий ўсишни жадаллаштириш бўйича қатъий топшириқлар берган. Аммо бозордаги воқелик билан расмий баёнотлар ўртасидаги тафовут жамоатчилик муҳокамаларини кучайтирмоқда.