Кремл урушни тўхтатишни рад этди: Путин музокараларни яна чўзмоқчи

«Вёрстка» нашрининг ёзишича, Россия раҳбари Владимир Путин Украинадаги урушни жорий чекка чизиқларда якунлашга тайёр эмас. Кремлга яқин манбаларнинг маълум қилишича, Москва Доналд Трамп таклиф этган фронт бўйлаб ўт очишни тўхтатиш режаси билан рози эмас, чунки бу Россия учун ҳарбий жиҳатдан заиф қарор ҳисобланади.

Биринчи манбанинг таъкидлашича, ҳозир тўхташ Россия учун келажакда яна шу хавфлар билан юзма-юз келишни англатади. «Москвада ҳисоблашмоқдаки, бу фурсатда тўхташ — кейин яна куч тўплаб, ўша ҳолатга қайтиш билан баробар», — деди манба. Шу сабаб Кремль урушни узайтириш ва Ғарбни чарчатиш стратегиясига ўтган.

Нашр суҳбатдошларидан бири Путин ҳали Украина президенти Володимир Зеленский билан ҳеч қандай битим имзолашга тайёр эмаслигини айтди. Унинг сўзларига кўра, Россия ҳарбий раҳбарияти Путинга Донецк областидаги Покровск ва Харьков вилоятидаги Купянскни эгаллашга ваъда берган. Ҳозир ушбу йўналишларда қаттиқ жанглар давом этмоқда ва Кремль «ушбу позициялар мустаҳкамланмагунча фронт чизиғини муҳокама қилмаслиги»ни билдирган.

Манбаларга кўра, Трамп билан Аляскада бўлган сўнгги учрашувдан кейин ҳам фронтда катта ўзгариш йўқ. Кремл ички сиёсий блокидаги манба «Оқ уй ҳали бизга ҳам, Украинага ҳам аниқ нарса таклиф эта олмаяпти», деб таъкидлади. У Венгрияда ўтказилиши кутилган Путин–Трамп саммитининг эҳтимолига шубҳа билан қаради.

Трамп эса сўнгги баёнотида Путин билан учрашув мумкинлигини айтган, аммо якуний қарор икки кун ичида маълум бўлишини билдирган. Унинг сўзларига кўра, Россия ва Украина ҳар ҳафтада камида 5–7 минг нафар аскарини йўқотмоқда. Трамп фронтдаги жорий чизиқ бўйича ўт очишни музлатиш ғоясини яна такрорлади.

Washington Post нашри манбаларининг ёзишича, Путин Трамп билан охирги телефон мулоқотида урушни якунлаш учун Украина Донбассни Россияга топшириши кераклигини талаб қилган. Эвазига у Запорижжя ва Херсон областларининг бир қисмини Киевга қайтаришни таклиф қилган. Володимир Зеленский эса бу талабни кескин рад этган.