«Лестер Сити» 300 миллион долларга сотувга қўйилди

Англиянинг «Лестер Сити» футбол клуби сотувга қўйилди. Бу ҳақда «Sky sports» нашри хабар берди.

Сотув жараёнини ташкил этиш мақсадида «Citigroup» инвестиция банки махсус тақдимот ишлаб чиққан. «Project Lineup» лойиҳаси номи остида шакллантирилган мазкур пакет нафақат клубнинг ўзини, балки унга тегишли бир қатор футбол ва кўчмас мулк активларини ҳам ўз ичига олади.

Сотув пакети нимадан иборат?

Қайд этилишича, потенциал харидорга жамоанинг эркаклар ва аёллар таркиби, «King Power» стадиони, машғулот базалари, шунингдек, «Лестер»нинг Белгиядаги ҳамкор клуби ҳисобланган «OH Leuven» ҳам берилади.

Ушбу лойиҳада жисмоний активлар 300 миллион долларга баҳоланган. Бироқ «King Power» футбол жамоаларини сотишдан айнан қанча маблағ кутаётгани аниқ кўрсатилмаган.

«Citigroup» таҳлилларига кўра, клубнинг 2026 молия йилидаги даромади 131 миллион долларни ташкил этиши кутилмоқда. Бироқ банк жамоанинг 2023 ва 2025 йиллар оралиғида икки марта қуйи лигага тушиб кетгани ва бунинг оқибатида кўрилган молиявий зарарлар ҳақида ҳеч қандай маълумот келтирмаган.

Эслатиб ўтамиз, Сривадданапрабҳа оиласи томонидан бошқариладиган «King Power» компанияси «Лестер»ни 2010 йилда Милан Мандаричдан 35 миллион фунтга сотиб олган эди.

Клуб «League One»да тўп сурмоқда

Ҳужжатда қайд этилишича, «Лестер» 2000 йилдан буён инглиз футболидаги энг муваффақиятли олтинчи жамоа ҳисобланади. Тақдимотда ушбу ҳолат «юқори дивизионларга чиқиш» бўйича ажойиб кўрсаткичга эга клубни сотиб олиш учун «камёб имконият» сифатида тақдим этилган.

«Лестер Сити» кетма-кет икки марта қуйи дивизионга тушиб кетди ва ҳозирда Англиянинг учинчи даражали лигаси ҳисобланган «League One»да тўп сурмоқда.

«Лестер» ўз тарихида Англия чемпионлигини (2016), уч бор Англия лига кубогини (1964, 1997, 2000), икки марта Суперкубокни (1971, 2021) ва бир марта мамлакат кубогини (2021) қўлга киритган.