«Nvidia» rahbarining yangi SI-chiplari haqidagi e’loni ortidan «Samsung» aksiyalari ko‘tarildi

Janubiy Koreyaning eng qimmat kompaniyasi «Samsung Electronics» Seuldagi savdolarda keskin o‘sdi. Investorlardagi qiziqish «Nvidia» rahbari Jensen Xuangning «Samsung»ning buyurtma mikrosxema ishlab chiqarish bo‘limi yangi SI-chiplarini tayyorlay boshlagani haqidagi bayonoti bilan bog‘liq. Intellektual texnologiyalardagi asosiy benefitsiar bilan hamkorlikni kengaytirish «Samsung»ga o‘zining chuqur yo‘qotishga uchragan kontraktli biznesini qaytadan daromadli qilish imkonini beradi.

O‘zi nima bo‘lgan edi?

«Samsung Electronics» aksiyalari «Nvidia» rahbari so‘zlari orqali 5 foiz qimmatlashdi, deb xabar berdi «Reuters». Xuang AQSHdagi «Nvidia GTC» konferensiyasida yangi mahsulotni taqdim etar ekan: «Groq LP30» chipini ishlab chiqarayotgan «Samsung» kompaniyasiga minnatdorman, ular to‘liq quvvat bilan ishlamoqda», dedi.

Uning aytishicha, «Groq LP30» «Nvidia»ning kelgusi avlod SI-platformaci «Vera Rubin»ga integratsiya qilinadi va uning yetkazib berilishi yilning ikkinchi yarmida boshlanadi. Shunday qilib, «Samsung» «Nvidia» bilan hamkorlikni yangi bosqichga olib chiqyapti. Ilgari «Samsung» faqat «Nvidia»ning sun’iy intellekt tezlatgichlari uchun tezkor xotira (HBM) ta’minlovchi bo‘lgan bo‘lsa, endi u SI-chiplarning ham kontraktli ishlab chiqaruvchisiga aylandi.

Analitiklar nima deydi?

«Nvidia» bilan shartnoma «Samsung»ning fond bozorida umidlarni oshirdi: bu hamkorlik, shuningdek, «Tesla», «Apple» va «Samsung»ning mobil qurilmalari uchun chiplar ishlab chiqaradigan kontraktli biznesni, so‘nggi yillardagi milliardlab yo‘qotishlardan keyin, qaytadan daromadli bo‘lishi mumkinligini ko‘rsatadi», deb xabar beradi «Reuters» sanoat ekspertlariga tayanib.

«Samsung»ning buyurtma chiplar bo‘limi 2027-yil oxiriga kelib yo‘qotishsiz ishlash darajasiga yetishi mumkin, deb prognoz qiladi «Heungkuk Securities»dan analitik Son In Chjun.

Kontraktli biznesning moliyaviy ko‘rsatkichlari uchun xavf omillari qatorida u xotira chiplarining qimmatlashishi sababli mobil telefonlarga bo‘lgan talabning zaiflashishi va 2030-yilgacha bu tanqislik saqlanishi mumkinligini ta’kidladi.

Uoll-strit «Samsung» aksiyalari haqida nima deydi?

«FactSet» ma’lumotlariga ko‘ra, 2026-yil uchun «Samsung»ning konsensus-reytinglari «sotib olish» (Buy) darajasida turibdi. Hizmat ma’lumotlariga ko‘ra, 40 ta ekspertdan 36 tasi hozir Janubiy Koreya gigantining aksiyalarini kengaytirishni tavsiya qiladi. «FactSet»ning o‘rtacha maqsadli narxi 1 aksiya uchun 251 ming von (168,6 dollar) bo‘lib, bu kotirovkalarda 28 foizgacha o‘sish imkoniyatini ko‘rsatadi.