Орбан Россия санкциялари ва Путин-Трамп саммити бекор қилиниши ортидан тузоққа тушди

CNN нашрининг ёзишича, Венгрия бош вазири Виктор Орбан яқинда Будапештни «тинчликка олиб борувчи шаҳар» деб атаган, чунки у ерда Доналд Трамп ва Владимир Путиннинг саммити бўлиб ўтиши кутилган эди. Бироқ Вашингтон учрашувни бекор қилиб, Россиянинг йирик нефт компаниялари — «Роснефт» ва «Лукойл»га нисбатан блокловчи санкциялари жорий этди.

Бу нафақат Кремл даромадларига, балки Россия нефт маҳсулотларига қаттиқ боғлиқ бўлган Венгрия иқтисодиётига ҳам зарба берди. Европадаги кўплаб давлатлар 2022 йилдан буён Россия энергиясидан воз кечаётган бир пайтда, Будапешт тескари иш тутиб, қайтага Россия нефт импортини тобора ошириб келаётганди.

CSD ва CREA таҳлил марказлари маълумотларига кўра, ҳозир Венгрия истеъмол қилаётган нефт хомашёсининг 92 фоизи Россиядан келади (уруш бошланишидан олдин бу кўрсаткич 61 фоиз эди). Фақат шу йилнинг ўзидаёқ Будапештнинг Россиядан импорт қилган нефт миқдори Кремл хазинасига 5,4 млрд евро тушум келтирган — бу тахминан 1800 та «Искандер-М» ракета қийматига тенг.

Шу билан бирга, Европа Иттифоқи 2027 йилдан бошлаб Россия суюлтирилган табиий газини (СТГ) импорт қилишни тўхтатиш режасини ҳам тасдиқлади. Бу эса Венгриянинг энергетика таъминотини янада мураккаблаштиради. Орбаннинг ўзи ҳам шундай шароитда «Россия энергия ресурсларисиз мамлакат иқтисодиёти тиз чўкиши мумкинлиги»ни тан олган.

Шунга қарамай, Орбан ҳукумати санкцияларни «айланма йўллар билан четлаб ўтиш устида ишлаяпти», деб баёнот берди. У бу режа қандай амалга оширилишини очиқламаган.

Орбан учун ички сиёсатда ҳам вазият оғирлашмоқда. Унинг собиқ ҳамкори Петер Мадяр бошчилигидаги мухолифат кучаймоқда ва баҳорги сайловларда жиддий рақобат кутилмоқда.

Олтинчи муддатни кўзлаётган Орбан саммитни ўзининг сиёсий ғалабаси сифатида кўрсатишни режалаштирган эди. Аммо натижада у бекор қилинган саммит, АҚШ санкциялари ва иқтисодий босим билан қолди — бу эса унинг нуфузига ва сайлов олди позициясига жиддий зарба бўлди.