O‘zbekiston terma jamoasining Jahon chempionati liboslarida Adidas matosidan nusxa olingani aytilmoqda

O‘zbekistonning mahalliy «7SABER» brendi tomonidan O‘zbekiston milliy terma jamoasining JCH-2026 uchun mo‘ljallangan uy va safar liboslari matosi «Adidas» kompaniyasining 2026 yilgi jahon chempionati uchun ishlab chiqqan yangi matosiga juda o‘xshash. Bu haqda futbol formalari dizayniga ixtisoslashgan «Footy Headlines» nashri yozmoqda.

Maqolada ta’kidlanishicha, yangi oq rangli safar libosining makrosuratlari matoning tuzilishini ochiq ko‘rsatgan. «7SABER» logotipi atrofidagi material havo o‘tkazish va namlikni tortishga mo‘ljallangan bo‘lib, unda o‘ziga xos uchta chiziqli teksturali to‘qima mavjud.

Bu to‘qima naqshi nemis kompaniyasi 2025 yilning noyabrida taqdim etgan original texnologik andozaga to‘liq mos kelishi aytilgan. Natijada, kuzatuvchilar o‘zbek brendi «Adidas»ning texnologik loyihasidan to‘g‘ridan-to‘g‘ri nusxa ko‘chirgan, degan xulosaga kelishgan.

Matoning kelib chiqishi va sanoatdagi holat

Qayd etilishicha, zamonaviy sport kiyimlarini ishlab chiqarish sanoatida kichik mustaqil brendlarning yirik kompaniyalar materiallariga tashqi ko‘rinishidan o‘xshash matolardan foydalanishi odatiy holat. Bunga «Nike» kompaniyasining «Vaporknit» matosi boshqalar tomonidan keng ko‘chirilgani misol qilib keltirilgan.

Shunday bo‘lsa-da, maqolada ikki brend matolari o‘rtasidagi jismoniy o‘xshashlikni inkor qilib bo‘lmasligi ta’kidlangan. Ma’lum qilinishicha, bu kabi to‘qima naqshlari yirik brendlarning matolarini ko‘chirib bosadigan xorijiy ishlab chiqaruvchilar orqali sotiladi. «Footy Headlines» nashrining taxminicha, «7SABER» yoki uning buyurtmasini bajaruvchi zavod ushbu mato nusxasini aynan o‘sha xorijiy ishlab chiqaruvchilar orqali qo‘lga kiritgan.