Ўзбекистонда қисқа фурсатга тўхтаган Жоржа Мелони Мирзиёев билан учрашди
Ўзбекистон Президенти Шавкат Мирзиёев Италия Бош вазири билан учрашув ўтказди.
Бугун, 19 январ куни Тошкент шаҳрида Ўзбекистон Президенти Шавкат Мирзиёев пойтахтда қисқа фурсатга тўхтаган Италия Бош вазири Жоржа Мелони билан учрашув ўтказди.
Учрашувда Ўзбекистон – Италия стратегик шериклик муносабатларини янада мустаҳкамлаш ва кўп қиррали ҳамкорликни кенгайтиришнинг амалий жиҳатлари кўриб чиқилган. 2025 йилнинг май ойида Самарқандда олий даражада эришилган келишувларнинг изчил амалга оширилаётгани мамнуният билан қайд этилган.
Италияда Ўзбекистон, Ўзбекистонда эса Италия киноси кунларини ўтказиш тўғрисида келишувга эришилди. Ўзбекистоннинг навбатдаги Венеция биенналесида иштирок этиши ҳамда бу йил Миланда амалий санъат ва музей кўргазмаларини ўтказиш режалари қўллаб-қувватланди.
Халқаро ва минтақавий кун тартиби юзасидан ҳам фикр алмашилди.
Учрашув якунида Ўзбекистон Президенти Шавкат Мирзиёев Италия Бош вазири Жоржа Мелонини Ўзбекистонга алоҳида ташриф билан келишга таклиф қилди.
Маълумот учун, икки давлат ўртасида товар айирбошлаш ҳажми ва қўшма корхоналарнинг сони барқарор ўсиб бормоқда. Ҳудудлараро, шу жумладан, Ломбардия билан алмашинувлар ривожланмоқда. Ўзбекистон фуқароларининг тартибли меҳнат миграцияси учун квоталар ажратилди.
“Finopera”, “ANCI”, “Pietro Fiorentini”, “Danieli” ва бошқа компаниялар билан ҳамкорликда йирик саноат кооперацияси лойиҳалари амалга оширилмоқда. Ўтган йил охирида Самарқандда Тушиа университетининг филиали очилди.
Жорий йилда ташқи сиёсат идоралари стратегик мулоқоти ва ҳукуматлараро комиссиянинг йиғилишлари, шунингдек, иккинчи Ректорлар форумини ўтказиш режалаштирилган.
