Putin ommaga ko‘proq ko‘rina boshladi. Kreml reyting uchun kurashmoqda

Rossiya prezidenti Vladimir Putin 2026 yil aprel va may oylarida tez-tez ommaga ko‘rinish bera boshladi.

«Faridaily» nashri Kreml matbuot xizmati ma’lumotlarini tahlil qilib, bu davrda Putin 60 ta ommaviy tadbirda qatnashganini ma’lum qildi. Taqqoslash uchun, yilning dastlabki uch oyida bunday tadbirlar soni 55 tani tashkil etgan.

Nashr ma’lumotlariga ko‘ra, so‘nggi ikki oy ichida Putin xorijga ham safar qildi. U Xitoy va Qozog‘istonga tashrif buyurgan, shuningdek, jamoatchilik vakillari bilan uchrashuvlarda qatnashgan.

Bu faollik Kreml Rossiya prezidentining jamoatchilik oldidagi imijini mustahkamlashga harakat qilayotgani haqidagi taxminlarni kuchaytirdi.

Bunga sabab sifatida rasmiy reytinglarda kuzatilayotgan pasayish ko‘rsatilmoqda. «Jamoatchilik fikri» fondi (FOM) va VSIOM ma’lumotlariga ko‘ra, so‘nggi oylarda Putinning faoliyatini qo‘llab-quvvatlash darajasida pasayish tendensiyasi qayd etilgan.

VSIOM hatto so‘rovnoma metodologiyasini o‘zgartirgan bo‘lsa-da, bu reytinglarning o‘sishiga olib kelmagan.

Xavfsizlik

Shu bilan birga, Putin Rossiya hududlari bo‘ylab safarlarni deyarli to‘xtatgan. Yanvar-may oylari davomida u Moskvadan rasman faqat ikki marta chiqib, har ikki holatda ham Sankt-Peterburgga borgan. O‘tgan yilning shu davrida esa davlat rahbari hududlarga sakkiz marta tashrif buyurgan.

«Faridaily» manbasining ta’kidlashicha, Xitoy va Qozog‘iston poytaxtlarida infratuzilma jihatidan xavfsizlikni ta’minlash Ryazan yoki Kemerovoga qaraganda osonroq.

May oyi boshlarida Yevropa davlatlaridan birining razvedka xizmati Vladimir Putin suiqasddan xavotirlanayotgani sababli uni himoya qilish sezilarli darajada kuchaytirilgani haqida xabar bergan edi.

«Mojem ob’yasnit» nashri esa amaldorlarga Rossiya prezidenti bilan uchrashuvlarga qo‘l soati taqib kelish taqiqlangani haqida yozgan.

Iyun oyi boshlarida «Financial Times» nashri Rossiya maxsus xizmatlari Eron oliy rahnamosi Ali Xomanaiy o‘ldirilganidan so‘ng, Rossiya prezidenti Vladimir Putin va davlatning boshqa oliy mansabdor shaxslari xavfsizligini ta’minlovchi maxsus kuzatuv tizimini bir muddatga o‘chirib qo‘ygani haqida xabar berdi.

Urush va texnologiyalar

Nashr manbalari Putinning ommaviy ko‘rinishi kamaygan davrda ham faol ishlashda davom etganini ta’kidlamoqda.

Xususan, u Ukrainadagi urush qatnashchilari va halok bo‘lgan harbiylarning oila a’zolari bilan uchrashuvlar o‘tkazayotgani aytilgan.

Shuningdek, Putin yuqori texnologiyalar va sun’iy intellekt sohasiga bag‘ishlangan yig‘ilishlarda ham faol ishtirok etmoqda. Biroq bu uchrashuvlar mazmuni haqida rasmiy ma’lumotlar deyarli e’lon qilinmagan.