Putin va amerikaliklar o‘rtasidagi uchrashuvning dastlabki natijalari e’lon qilindi
Muzokaralar uch soatdan ko‘proq davom etgan.
© MeduzaAQSH prezidenti maxsus vakili Stiv Uitkoff va Donald Trampning kuyovi Jared Kushner 5-sentabr kuni Moskvada Rossiya prezidenti Vladimir Putin bilan muzokara o‘tkazdi.
Uchrashuvdan so‘ng ular 6-sentabr kuni Kiyevga borib, Ukraina prezidenti Volodimir Zelenskiy bilan urushni tugatish imkoniyatlarini muhokama qildi. Bu Uitkoff va Kushnerning Rossiya bosqini boshlanganidan beri Kiyevga ilk tashrifi bo‘ldi.
Putin bilan bo‘lib o‘tgan suhbat uch soatdan ko‘proq davom etgan. Oq uy vakilining ta’kidlashicha, tomonlar yaqin haftalar ichida e’lon qilinishi kutilayotgan navbatdagi qadamlar yuzasidan sermazmun fikr almashgan.
Avvalroq Donald Tramp o‘z vakillari Moskvaga urushni to‘xtatish bo‘yicha aniq takliflar bilan ketayotganini va o‘zaro kelishuvga erishish uchun «juda yaxshi imkoniyat» borligini bildirgan edi.
Amerikalik muzokarachilar Kiyevga jo‘nab ketishdan avval, qurolli to‘qnashuvga barham berishning ehtimoliy yo‘llari yuzasidan Rossiya tomonining munosabati va takliflarini olgan.
Amerika prezidenti Donald Tramp Uitkoff va Kushnerni «buyuk muzokarachilar» deb atab, ular Moskvaga aynan Qo‘shma Shtatlarning tinchlik tashabbusini ilgari surish maqsadida jo‘nab ketganini alohida qayd etgandi.
Shunga qaramay, Putin bilan bo‘lib o‘tgan uchrashuvdan so‘ng AQSH vakillari muhokama qilingan takliflarning aniq tafsilotlarini hozircha ommaga oshkor qilmadi.
