Rossiya Qozog‘iston va boshqa mamlakatlardan benzin qidirmoqda

Rossiya neftni qayta ishlash zavodlariga dronlar hujumi oqibatida yuzaga kelgan benzin taqchilligini kamaytirish uchun dengiz orqali yoqilg‘i import qilishni rejalashtirmoqda. Manbalarga ko‘ra, benzinning bir qismi Osiyo, jumladan Qozog‘iston orqali Rossiyaning g‘arbiy portlariga yetkazib beriladi.

Rossiya avval ham Qozog‘iston va Belarusdan oz miqdorda benzin xarid qilgan. Biroq mutaxassislarning ta’kidlashicha, ushbu davlatlarda Rossiyada yuzaga kelishi mumkin bo‘lgan yirik tanqislikni qoplash uchun yetarli zaxira mavjud emas.

Shu sababli Rossiya benzin eksportini iyul oyi oxirigacha taqiqlagan. Yoqilg‘i taqchilligi allaqachon Qrim va Sibirdagi ikki hududda qayd etilgan. OAV xabarlariga ko‘ra, yana 12 ta hududda ham shunga o‘xshash muammolar kuzatilmoqda.

Mutaxassislar fikricha, dengiz orqali benzin import qilish qisqa muddatli yechim bo‘lishi mumkin. Biroq yuqori transport xarajatlari va logistika muammolari tufayli bu choralar tanqislikni to‘liq bartaraf eta olmaydi.

Avvalroq, Ukraina dronlari Moskvadagi eng yirik neftni qayta ishlash zavodiga zarba bergani haqida xabar qilingan edi.