Шаҳрисабз кўчасидаги BRT йўлагининг биринчи босқичи фойдаланишга топширилди

Тошкент шаҳрида Шаҳрисабз кўчасидаги BRT йўлагининг биринчи босқичи фойдаланишга топширилди. Лойиҳа 1,2 километрлик участкани қамраб олган. Бу ҳақда Йўл ҳаракатини ташкил этиш маркази хабар бермоқда.

Лойиҳанинг биринчи босқичи Шаҳрисабз, Миробод ва Шота Руставели кўчалари туташган айланма чорраҳадан Амир Темур шоҳ кўчаси билан кесишмагача бўлган 1,2 километрлик йўл қисмини ўз ичига олган.

Йўл конструкцияси тўлиқ қайта қурилди

Қурилиш ишлари давомида мавжуд асфальт қопламасини янгилаш билан чекланилмаган. Катта сиғимли автобусларнинг мунтазам ҳаракати ва доимий юкламаси ҳисобга олиниб, BRT йўлагининг йўл ости конструкцияси тўлиқ қайта қурилган.

Айрим қисмларда 2 метрдан ортиқ чуқурликкача қазиш ишлари амалга оширилиб, мавжуд асос олиб ташланган ва йўл пойдевори қайта шакллантирилган. Грунт намлиги, тупроқнинг силжиши ҳамда кейинчалик чўкиш хавфини камайтириш мақсадида геотекстил қопламаси ётқизилган.

Шундан сўнг йўл асоси босқичма-босқич мустаҳкамланган. Хусусан, 35 сантиметр қалинликдаги қум-шағал аралашмаси ётқизилган, М-75 маркали мустаҳкамловчи қатлам ташкил этилган.

Шунингдек, 9 сантиметр қалинликдаги йирик донали асфальт-бетон қатлами ётқизилиб, якуний қоплама сифатида 5 сантиметр қалинликдаги PSHMA-20 қўлланилган.
BRT инфратузилмаси доирасида 5 та янги автобус бекати ташкил этилган. Жамоат транспорти учун алоҳида ҳаракат йўлаги шакллантирилиб, у умумий транспорт оқимидан бордюрлар орқали жисмонан ажратилган.

Қурилиш ишлари давомида йўл ҳаракати тўлиқ тўхтатилмаган. Ишлар марказий қисмдаги тасмаларда босқичма-босқич олиб борилган ва транспорт воситалари ҳаракати кўчанинг икки йўналишидаги чекка ўнг тасмаларда сақлаб қолинган.

1,2 километрлик ушбу участка Шаҳрисабз кўчасида BRT инфратузилмасини шакллантиришнинг биринчи босқичи ҳисобланади. Умумий лойиҳа доирасида Шаҳрисабз кўчасининг қарийб 3 километрлик қисмида BRT йўлагини ташкил этиш кўзда тутилган.