Tramp istagan tayinlov amalga oshdi: Kevin Uorsh Federal zaxira tizimi raisi bo‘ldi

AQSH Senati joriy yilning 13-may kuni Kevin Uorsh nomzodini mamlakat Markaziy banki — Federal zaxira tizimi (FZT) raisligiga tasdiqladi. Ushbu tayinlov Prezident Donald Tramp va Federal zaxira tizimi o‘rtasidagi munosabatlarda yangi davr boshlanishidan dalolat beradi. Bu haqda «The Business Times» nashri xabar bermoqda.

Yuqori palatadagi ovoz berish jarayonida Uorshning nomzodi 54 ta «ha» va 45 ta «yo‘q» ovozi bilan ma’qullandi. U 15-may kuni vakolat muddati tugaydigan Jerom Pauellning o‘rnini egallaydi. Deyarli barcha demokrat senatorlar Uorshning nomzodiga qarshi ovoz berishdi. Bunga uning Markaziy bankning an’anaviy siyosiy mustaqilligini saqlab qolish borasidagi pozitsiyasiga nisbatan shubhalar sabab bo‘lgan.

Siyosiy bosim va institutsional mustaqillik uchun kurash

Prezident Donald Tramp o‘tgan yildan beri Federal zaxira tizimining mustaqilligiga nisbatan bosim o‘tkazib kelayotgan edi. Jumladan, Prezident FZT boshqaruvchisi Liza Kukni asossiz ayblovlar bilan ishdan bo‘shatishga uringan va ayni paytda ushbu masala bo‘yicha Oliy sudning qarori kutilmoqda. Shuningdek, Tramp Jerom Pauellni foiz stavkalarini yetarlicha tez pasaytirmaganlikda bir necha bor ayblagan va unga nisbatan Adliya vazirligi orqali tergov harakatlarini boshlash bilan tahdid qilgan edi.

Adliya vazirligining Pauellga nisbatan tergovlari bir muddat Kevin Uorshning nomzodi tasdiqlanishiga to‘sqinlik qildi. Senatning Bank qo‘mitasi a’zosi Tom Tillis Pauellga nisbatan huquqiy tahdidlar to‘xtatilmaguncha har qanday nomzodni bloklashga va’da bergandi. Biroq Kolumbiya okrugi prokurori Janin Pirroning tergovni vaqtincha to‘xtatishi Senatdagi to‘siqlarning olib tashlanishiga yo‘l ochdi.

Jerom Pauell raislik muddati tugaganidan keyin ham FZTni tark etmasligini va 2028 yilning yanvarigacha boshqaruvchi sifatida faoliyatini davom ettirishini ma’lum qilgan.

Pauellning so‘zlariga ko‘ra, Markaziy bankka nisbatan bo‘layotgan siyosiy hujumlar uni muassasa mustaqilligini himoya qilish uchun lavozimida qolishga majbur qilmoqda. U o‘z faoliyatini davom ettirishini «institutni siyosiy omillardan himoya qilish» istagi bilan izohlagan.

«Rejim o‘zgarishi»: Yangi rais va iqtisodiy noaniqlik davri

Kevin Uorsh FZTda «rejim o‘zgarishini» amalga oshirishga va’da bergan. U Uoll-stritda tajribaga ega bo‘lib, 2006 yildan 2011 yilgacha FZT boshqaruvchisi sifatida ishlagan. Uorsh davlat obligatsiyalari va ipoteka qimmatli qog‘ozlari portfelini boshqarish, iqtisodiy ma’lumotlarni tahlil qilish va siyosiy qarorlarni ommaga yetkazish usullarini isloh qilish niyatida ekanini bildirgan.

Biroq yangi rais murakkab iqtisodiy vaziyatga duch kelmoqda. Eron bilan bo‘layotgan urush tufayli energiya narxlarining oshishi inflatsiyani yuqori darajada ushlab turibdi. Bu esa Prezident Tramp istayotgan foiz stavkalarini pasaytirish imkoniyatini kamaytiradi. Investorlar joriy yilda stavkalar pasaytirilishi ehtimolini deyarli istisno qilishmoqda, aksincha, kelgusi yilda stavkalarning oshirilishi mumkinligi haqidagi taxminlar kuchaygan.

Kevin Uorsh raisligidagi Federal ochiq bozor qo‘mitasining birinchi yig‘ilishi 16-17-iyun kunlariga belgilangan. Unda Markaziy bankning kelgusi monetar siyosati bo‘yicha dastlabki jiddiy qarorlar qabul qilinishi kutilmoqda.