Tramp prezidentligining birinchi yilida dunyo savdosida Xitoyning ulushi oshdi

Donald Tramp prezidentlikka kirishganidan bir yil o‘tib, xalqaro savdo maydonida jiddiy geoiqtisodiy o‘zgarishlar kuzatilmoqda. «Reuters» tahliliga ko‘ra, «Amerika birinchi» siyosati AQSHning an’anaviy ittifoqchilari bilan munosabatlarini sovitar ekan, Xitoy ushbu vaziyatdan foydalanib, boshqa yirik hamkorlar bilan aloqalarni faol ravishda mustahkamlamoqda.

Rekord savdo natijalari

2025 yilda Xitoyning tashqi savdo profitsiti tarixda ilk bor 1,2 trln dollarga yetdi. Shu bilan birga, oylik valuta tushumlari 100 mlrd dollargacha chiqib, eng yuqori darajani qayd etdi. Yuandan xalqaro hisob-kitoblarda foydalanish ko‘lami ham sezilarli kengaydi.

Yangi hamkorliklar geografiyasi

Tahlilchilar fikricha, Xitoy Kanada, Hindiston va Yevropa davlatlari bilan aloqalarni chuqurlashtirish orqali o‘zini barqaror va ishonchli savdo hamkori sifatida ko‘rsatmoqda. Buyuk Britaniya bosh vaziri Kir Starmerning Xitoyga tashrifi va Kanada bosh vaziri Mark Karni bilan imzolangan yangi iqtisodiy kelishuvlar shu strategiyaning bir qismi sifatida baholanmoqda.

AQSH bilan keskinlik

Tramp ma’muriyati 2025 yil boshida Xitoyga nisbatan bojlarni 100 foizdan oshirgan bo‘lsa-da, Pekin eksportni AQSHdan tashqari bozorlarga yo‘naltirdi. Natijada Afrikaga eksport 25,8 foizga, Janubi-Sharqiy Osiyoga 13,4 foizga, Yevropa Ittifoqiga 8,4 foizga oshdi. AQSHga eksport esa 20 foizga qisqardi.

Yuanning global o‘rni

Trampning savdo siyosati dollarga nisbatan ishonchni susaytirgani fonida Xitoy yuanning global maqomini kuchaytirishga urinmoqda. Hozirda mamlakatning chegaralararo operatsiyalarining yarmidan ko‘pi yuanda amalga oshirilmoqda.