Зеленский Донбасс тақдири бўйича референдум ўтказишга тайёр

Украина президенти Володимир Зеленский Донбасс устидан назорат масаласида қарор фақат халқ иродаси асосида қабул қилиниши кераклигини маълум қилди, деб ёзмоқда Bloomberg.  Унинг таъкидлашича, бу позиция сайлов ёки референдум форматида ифодаланиши мумкин.

«Бу саволга Украина халқи жавоб беради. Сайлов орқалими ёки референдум орқалими — лекин халқ позицияси бўлиши шарт», — деди Зеленский.

Украина президентининг айтишича, АҚШ томони Донбасс ҳудудида махсус иқтисодий зона ташкил этиш ғоясини илгари сурмоқда. Ушбу режага кўра, Украина қўшинлари ҳудуддан чиқади, бироқ Россия ҳарбийлари ҳам у ерга киритилмайди. Шу билан бирга, ушбу ҳудуд ким томонидан бошқарилиши масаласи очиқ қолмоқда. Зеленскийнинг таъкидлашича, Вашингтон буни «демилитаризация қилинган» ёки «эркин иқтисодий зона» деб аташни таклиф қилган.

Бу баёнот Германия, Франция ва Буюк Британия раҳбарларининг АҚШ президенти Доналд Трамп билан телефон мулоқотидан сўнг янгради. The Wall Street Journal нашрининг маълум қилишича, Трамп Европа давлатларини Киевга босим ўтказиб, АҚШ таклиф қилаётган тинчлик режасини қабул қилишга ундашга чақирган. Ушбу режада ҳудудий ён беришлар ва Украина Қуролли кучлари сонини чеклаш назарда тутилган.

Германия канцлери Фридрих Мерц музокаралар марказида айнан ҳудудий масалалар турганини тасдиқлаб, бу қарорни фақат Украина раҳбарияти ва халқи қабул қилиши мумкинлигини таъкидлади.

Зеленскийнинг сўзларига кўра, АҚШ ташаббуси билан ишлаб чиқилаётган 20 пунктли тинчлик режаси устида кундалик иш олиб борилмоқда. Киев Вашингтонга янгиланган ҳужжатни тақдим этган. Унда баҳсли ҳудудлар ва Запорижжя атом электр станцияси назорати бўйича янги таклифлар мавжуд.

Янги вариантда Украина Қуролли кучлари сони 800 минг нафар этиб белгиланган. Илк версияда эса бу чеклов 600 минг нафар эди. Зеленский бу рақам ҳарбийлар билан келишилган реал кўрсаткич эканини таъкидлади.

Аввалроқ Зеленский Путин билан илк учрашувида унга нима дегани ҳақида хабар берган эдик.