«Адолат» партияси қоидабузар ҳайдовчилар учун жазоларни кескин оширишни таклиф этди

Ўзбекистонда йўл ҳаракати хавфсизлигини таъминлаш масаласи яна кун тартибига чиқди. «Адолат» социал-демократик партияси йўлларда содир бўлаётган фожиавий ҳолатлар фондида ҳайдовчилар жавобгарлигини кучайтириш бўйича бир қатор ташаббусларни илгари сурди.

Партия баёнотида таъкидланишича, сўнгги йилларда мамлакатда йўл-транспорт ҳодисалари сони юқори даражада қолмоқда. Фақат 2024 йилнинг ўзида 9364 та ЙТҲ қайд этилган, уларда қарийб 9 минг киши жароҳат олган ва 2203 нафар фуқаро ҳалок бўлган. Жабрланувчиларнинг катта қисми болалар эканлиги жамиятни жиддий ташвишга солмоқда.

Шу муносабат билан партия қуйидаги чораларни таклиф этди: биринчидан, йўлларда ўлим ҳолатини кескин камайтириш учун халқаро Vision Zero дастурини жорий этиш; иккинчидан, «Мактаб атрофи — хавфсиз ҳудуд» дастурини қабул қилиш орқали болалар хавфсизлигини кучайтириш; учинчидан, йўл қоидаларини такрор бузган ҳайдовчилар учун суғурта тўловларини ошириш орқали иқтисодий жавобгарликни кучайтириш; тўртинчидан, вояга етмаганлар ўлими билан боғлиқ ЙТҲларда жазони икки баробар оғирлаштириш ва таълим муассасалари атрофида тезликни оширганларга нисбатан қатъий жавобгарлик белгилаш.

Партиянинг энг муҳим таклифларидан бири — тезликни сурункали равишда оширган ҳайдовчиларни транспорт воситасини бошқариш ҳуқуқидан амалдаги уч йил эмас, балки ўн йилгача маҳрум қилиш; шунингдек, маст ҳолда одам ўлимига сабаб бўлган ҳайдовчиларни умрбод ҳайдовчилик гувоҳномасидан маҳрум этишдир.

«Йўлларда аҳоли, айниқса, болалар хавфсиз ҳаракатлана олмас экан, бу бутун жамият учун сигнал бўлиши керак», — дейилади партия баёнотида.

«Адолат» партияси фракцияси ушбу ташаббусларни қонунчилик ташаббуси сифатида Олий Мажлисга киритишини маълум қилди.

Маълумот учун, 2024 йилда 9364 та йўл-транспорт ҳодисалари содир бўлган ва аварияларда 2203 нафар одам вафот этган.