АҚШ тарифлари бўйича ноаниқлик сабаб доллар пасаймоқда
Бугун кўпчилик Осиё валюталари қимматлашди, АҚШ доллари эса пасайди. Бу ҳолат инвесторлар АҚШ Олий суди Доналд Трамп президентлигидаги аввалги тариф дастурига қарши чиқарган қарор ва унинг кейинчалик бошқа қонун доирасида божларни қайта жорий этиш чораси оқибатларини баҳолаши билан боғлиқ.
АҚШ доллари (USD) индекси Осиё савдолари бошида 0,4 фоизга пасайди, шу билан бирга, Тошкент вақти билан 10:04 ҳолатига кўра АҚШ доллари индекси фючерслари ҳам 0,4 фоизга тушди. Бу ҳақда «Investing» ёзди.
Осиё валюталари ўсмоқда
USD/JPY жуфтлиги (япон иенаси) 0,5 фоизга пасайди, иена эса ҳимоя активи мақоми туфайли қўллаб-қувватлов олди.
USD/KRW жуфтлиги (Жанубий Корея вони) 0,2 фоизга тушди, офшор USD/CNH жуфтлиги (Хитой юани) эса 0,1 фоизга пасайди.
Тарифларни бекор қилиш
Ўтган ҳафта АҚШ Олий суди Трамп томонидан фавқулодда ваколатлар доирасида жорий этилган кенг кўламли тарифлар ҳуқуқий жиҳатдан асосланмаган, деган қарор чиқарди ва унинг савдо сиёсатидаги асосий унсурлардан бирини бекор қилди. Бозорлар дастлаб бу қарорни савдо зиддиятларининг юмшаши ва глобал ўсиш учун ижобий сигнал сифатида қабул қилди.
Трампнинг жавоби
Жавоб тариқасида президент Доналд Трамп АҚШ савдо қонунчилигининг 122-бўлимига мувофиқ импортга 150 кун муддатга 10 фоиз миқдорида янги глобал тариф жорий этилганини эълон қилди. Кейинчалик у ставкани ушбу қоида доирасида рухсат этилган энг юқори даража – 15 фоизгача оширди.
Бу ҳолат Осиё экспортчилари учун истиқболларни мураккаблаштирди, чунки уларнинг кўпчилиги АҚШ талабига катта даражада боғлиқ. Жанубий Корея, Япония ва бошқа қатор иқтисодиётлар аввал Вашингтон билан савдо келишувлари тузган ёки тарифлардан озод этилган эди.
Минтақавий фонд бозорлари турлича динамикани намоён қилди, бу эса АҚШнинг юқори тарифлари таъминот занжирлари ва капитал оқимларига таъсири бўйича сақланаётган эҳтиёткорликни акс эттирди.
ФЗТ эҳтиёткорлиги сақланмоқда
Бозор эҳтиёткорлигини кучайтирган яна бир омил шукни, ўтган ҳафтаги АҚШ иқтисодий маълумотлари иқтисодий ўсиш секинлашаётганини ва инфляция барқарорлигича қолаётганини кўрсатди. Бу эса Федерал захира тизими (ФЗТ)нинг фоиз ставкалари сиёсати истиқболини янада ноаниқлаштирди.
Секин ўсиш ва барқарор инфляция комбинацияси жорий йилда фоиз ставкаларини сезиларли пасайтириш бўйича кутилмаларни ортга сурди.
Осиёга қайтсак, USD/INR жуфтлиги (Ҳинд рупияси) деярли ўзгаришсиз савдо қилинди, USD/SGD жуфтлиги (Сингапур доллари) эса 0,1 фоизга пасайди.
AUD/USD жуфтлиги (Австралия доллари) 0,2 фоизга тушди.
