Банк кредитларининг асосий қисми қайси соҳаларга ажратилмоқда?

Ўзбекистондаги банкларнинг жами кредит қўйилмалари ўтган йилнинг мос даврида нисбатан 13 фоизга ўсиб, 659,1 трлн сўмни ташкил этди. Бу Марказий банк маълум қилди.

Шундан энг катта улуш жисмоний шахсларга тўғри келади. Уларга ажратилган кредитлар қолдиғи 248,4 трлн сўм ёки умумий портфелнинг 38 фоизини ташкил қилган.

Иккинчи ўринда саноат соҳаси жойлашган. Ушбу тармоққа йўналтирилган кредитлар қолдиғи 133,4 трлн сўм бўлиб, жами кредитларнинг 20 фоизига тенг.

Бошқа соҳаларга ажратилган кредитлар 88 трлн сўмни ташкил этган. Бу умумий портфелнинг 13 фоизидир. Қишлоқ хўжалигига йўналтирилган кредитлар эса 68 трлн сўм ёки жами кредитларнинг 10 фоизини ташкил қилган.

Савдо ва умумий хизматлар соҳасига ажратилган кредитлар қолдиғи 53,9 трлн сўмни ташкил этган. Бу банклар жами кредит портфелининг 8 фоизига тўғри келади.

Транспорт ва коммуникация соҳаси 37,9 трлн сўмлик кредит билан кейинги ўринда турибди. Ушбу йўналишнинг умумий кредитлардаги улуши 6 фоизни ташкил этган.

Қурилиш соҳасига йўналтирилган кредитлар қолдиғи 22,9 трлн сўм бўлиб, жами портфелнинг 3 фоизига тенг. Моддий ва техник таъминотни ривожлантириш соҳасига 4,6 трлн сўм, уй-жой коммунал хизматига эса 2 трлн сўм кредит тўғри келган.

Кредитларнинг ўсиш сурати

2025-йил 1-октябр билан таққослаганда, кредит портфелининг тармоқлар бўйича таркибида ҳам ўзгаришлар бор.

Жумладан, жисмоний шахсларнинг улуши 36 фоиздан 38 фоизга, савдо ва умумий хизматлар соҳасининг улуши 7 фоиздан 8 фоизга кўтарилган.

Саноатнинг улуши эса 25 фоиздан 20 фоизга тушган. Қишлоқ хўжалиги, транспорт ва қурилиш соҳаларининг кредит портфелидаги улуши деярли ўзгармаган.

Эслатиб ўтамиз, аввалроқ Ўзбекистондаги банк кредитларининг 45 фоизи ва депозитларининг 76 фоизи Тошкент шаҳрига тўғри келаётгани ҳақида хабар берилганди.