Beeline, Ucell, Mobiuz ва Uztelecom: 2025 йилда қайси алоқа оператори кўпроқ солиқ тўлади?
2025 йилда хизмат кўрсатиш соҳасидаги солиқ тушумлари ичида алоқа операторлари муҳим улушни таъминлади. Тўртта компания бир йилда давлатга жами 2 452,5 млрд сўм солиқ тўлади.
2025 йилда алоқа операторлари ўртасида энг йирик солиқ тўловчи компания «O‘zbektelekom» бўлди. Давлат Солиқ қўмитаси маълумотига кўра, компания ўтган йили бюджетга 1,36 трлн сўм солиқ тўлаган.
Ўз навбатида 2025 йил «O‘zbektelekom» учун молиявий жиҳатдан кескин ўсиш йилига айланди. Компания ўтган йилнинг 9 ойида 321 млрд сўм соф фойда қайд этди. Солиштириш учун, 2024 йилнинг шу даврида бу кўрсаткич атиги 17,4 млрд сўмни ташкил этган эди.
«Unitel» МЧЖ — «Beeline» «O‘zbektelekom»дан қарийб уч баробар кам кўрсаткич билан 2025 йилда бюджетга 495,4 млрд сўм солиқ тўлаган.
Ўзбекистондаги йирик хусусий мобил алоқа операторларидан бири ҳисобланган «Beeline» (Unitel)нинг 2025 йилдаги молиявий натижалари ҳозирча очиқланмаган. iHamkor.uz маълумотларига кўра, компания 2024 йилда 146,1 млрд сўм соф фойда қайд этган.
«Coscom» яъни «Ucell» 360,3 млрд сўм солиқ тўлади. «Ucell»нинг ҳам 2025 йилдаги фойда ва зарари ҳақида маълумот эълон қилинмаган. Лекин компания 2024 йилда «Uztelecom»дан ҳам «Beeline»дан ҳам кўпроқ: 254,6 млрд сўм фойда олган.
«Mobiuz» (Universal Mobile Systems) эса 2025 йилда бюджетга 235,3 млрд сўм солиқ тўлаган. Шунингдек, оператор ўтган йил якунларига кўра 173,6 млрд сўм соф фойда қайд этган.
Маълумот учун, ҳозирда «Mobiuz» компаниясини хусусийлаштириш жараёнлари кетмоқда. Давлат активларини бошқариш агентлигининг 2025 йил 30 декабрдаги баёнотига кўра, (https://gov.uz/uz/davaktiv/news/view/115357) компанияни сотиб олишга давогар боълган 6 та талабгорнинг мажбуриятга эга таклифлари қабул қилиб олинга ва улардан 3 таси жозибали деб топилган. Жозибали деб топилган таклифлар эгаларига 23 январгача ўз таклифларини яхшилаш учун муҳлат берилган. Муддат тугади, лекин ҳалигача Давактив расмий баёнот бермади.
«Mobiuz» ни хусусийлаштириш учун стратегик ва молиявий консультант сифатида «Rothschild & Co», солиқ ва юридик экспертиза учун «KPMG», мустақил баҳоловчи сифатида «Deloitte» компаниялари жалб этилган.
