Эрон Хитойнинг товушдан тезучар ракеталарини сотиб олиш арафасида
Теҳрон Пекиндан АҚШ Ҳарбий-денгиз кучлари кемаларига таҳдид сола оладиган ракеталарини харид қилиши мумкин.
© Foto: trtrussian.comЭрон Хитойдан СМ-302 русумли юқори тезликдаги кемаларга қарши қанотли ракеталарни сотиб олишга яқинлашди. Манбаларга кўра, музокаралар икки йил аввал бошланган бўлиб, 2025 йил июн ойида АҚШ Эроннинг учта ядровий объектига зарба беришга қўшилганидан сўнг янада жадаллашган.
Гап тахминан 290 километр масофага учиш имконига эга, кемаларнинг мудофаа тизимларини четлаб ўтиш қобилиятига эга ракеталар ҳақида бормоқда. Ҳозирча етказиб бериш санаси келишилмаган. Музокаралар АҚШнинг Яқин Шарқдаги ҳарбий ҳузурини кучайтиргани фонида кечмоқда.
АҚШнинг «Авраам Линколн» авианосец зарба гуруҳи Араб денгизида фаолият юритмоқда, «Джералд Форд» эса Ўрта ер денгизининг шарқий қисмида жойлашган. Илгарироқ Эрон Хитойдан зенит-ракет комплексларини ҳам сотиб олгани, улар учун нефть етказиб бериш орқали ҳисоб-китоб қилгани хабар қилинган эди.
Хитой ҳозирда Эрон нефтини энг кўп импорт қилувчи давлат бўлиб, баҳолашларга кўра, Эрон хомашё экспортининг қарийб 90 фоизи Пекинга йўналтирилади. Шу билан бирга, дипломатлар Пекин Вашингтон билан савдо келишмовчиликларидан сўнг яқинлашув шароитида можарога ортиқча аралашишдан қочиши мумкинлигини таъкидламоқда.
Эрон ва Хитой ўртасидаги ҳарбий ҳамкорлик ўнлаб йиллар давом этмоқда. 1980-йиллар охирида Теҳрон Хитойдан қанотли ракеталар олган ва улардан Ироқ билан уруш даврида фойдаланган. Таҳлилчилар янги кемаларга қарши ракеталар етказиб берилиши АҚШ ҳарбий кемаларига бевосита таҳдид сифатида баҳоланиши ва вазиятни янада кескинлаштириши мумкинлигини қайд этмоқда.
Аввалроқ Эрон Ормуз бўғозини ёпиш билан таҳдид қилган эди. Дунё нефт таъминотининг қарийб 20 фоизи шу йўлак орқали амалга оширилади. Ўтган ҳафта бўғоз вақтинча ёпилди, шунингдек, Эрон, Хитой ва Россия Ормуз бўғози, Уммон кўрфази ҳамда Ҳинд океанининг шимолий қисмида қўшма ҳарбий машқлар ўтказди.
