Форс кўрфазидаги энг йирик нефт ишлаб чиқарувчи мамлакат қазиб олишни қисқартиряпти
Дунёда нефт ишлаб чиқариш бўйича АҚШдан кейин иккинчи ўринда турувчи давлат қазиб олишни қисқартиришни бошлади. Бундай қарор Ҳўрмуз бўғози амалда блоклангани билан боғлиқ.
Форс кўрфазидаги энг йирик ва дунёда АҚШдан кейин иккинчи ўринда турувчи нефт ишлаб чиқарувчи давлат бўлган Саудия Арабистони нефт қазиб олишни қисқартиришни бошлади. Бу ҳақда вазиятдан хабардор манбага таяниб, «Bloomberg» хабар қилди.
Манбага кўра, бундай қарор Ҳўрмуз бўғози амалда блоклангани билан боғлиқ. Эрон соҳиллари яқинида жойлашган ушбу тор денгиз йўли орқали дунёдаги барча денгиз орқали ташиладиган нефтнинг тахминан бешдан бир қисми ўтади. Кемалар ҳаракатининг чекланиши мамлакатдаги нефт сақлаш резервуарларининг тўлиб кетишига олиб келган.
Портни ўзгартириш
Саудия Арабистони кунига тахминан 10 миллион баррел нефт ишлаб чиқаради ва унинг 7 миллион баррелга яқинини экспорт қилади. Ўтган ҳафта Яқин Шарқдаги можаро кучайиши сабабли «Saudi Aramco» компанияси экспортнинг бир қисмини одатдаги йўналиш – Ҳўрмуз бўғози орқали эмас, балки Қизил денгиздаги Янбу порти томон йўналтиришни бошлаган.
«Бироқ нефтни ташиш учун ишлатиладиган қувур ўтказгичининг ўтказиш қобилияти барча экспорт ҳажмини тўлиқ қоплаш учун етарли эмас», – деб ёзади «Bloomberg».
Саудия биринчи давлат эмас
Ўтган ҳафта Яқин Шарқда нефт қазиб олишни қисқартирган биринчи йирик экспортёр Ироқ бўлди. 3-март куни у ўзининг учта йирик нефт конларида ишлаб чиқаришни қисқартиришини эълон қилди.
5-март куни «Financial Times» манбаларига таяниб хабар беришича, Саудия Арабистони нефть сақлаш омборлари тўлиб кетиши сабабли икки ҳафта ичида у ҳам қазиб олишни қисқартиришга мажбур бўлиши мумкин эди.
Дунёдаги энг йирик нефт экспортчиларидан ҳисобланган Саудия Арабистони минтақадаги энг катта нефт омборларига эга. Бироқ сунъий йўлдош тасвирлари баъзи объектлар аллақачон тўлиб бораётганини кўрсатган. Бу ҳақда сунъий йўлдош таҳлили билан шуғулланувчи «Kayrros» компанияси ҳаммуассиси Антон Ҳалфф маълум қилган.
Унинг сўзларига кўра, 5-март ҳолатига кўра Форс кўрфазидаги энг йирик нефт терминалларидан бири «Juaymah Terminal» тез суръатда тўлиб бораётган ва бўш қувватлар камайиб бораётган эди.
Нефт бозорида нима бўляпти?
«Financial Times»нинг ёзишича, нефт қазиб олишдаги катта узилишлар нефт нархининг янада кескин ўсишига олиб келиши мумкин.
Бугун, 9-март куни савдоларда «Brent» нефти нархи кун давомида баррел учун 119,5 долларгача кўтарилди. Апрель ойида етказиб бериш бўйича «West Texas Intermediate» фючерслари ҳам 119,48 доллар даражасида савдо қилинди.
