Марказий Осиё–Буюк Британия: янги мулоқот формати ишга тушди

Ўзбекистон ташқи ишлар вазири Бахтиёр Саидов Лондонда бўлиб ўтган илк «Марказий Осиё – Буюк Британия» вазирлар учрашувида иштирок этди. Тадбир Буюк Британия ташқи ишлар, Ҳамдўстлик ва тараққиёт бўйича давлат котиби Иветт Купер раислигида ўтказилди.

Учрашувда минтақанинг иқтисодий ривожланиш истиқболлари, савдо ва инвестицияларни диверсификация қилиш, саноат ҳамкорлиги ва икки томонлама алоқаларни кенгайтириш масалалари муҳокама қилинди. Томонлар барқарор инфратузилма, стратегик аҳамиятга эга минерал ресурслар ва қайта тикланувчи энергетика салоҳиятидан самарали фойдаланиш бўйича ҳам фикр алмашди.

Иқтисодий кун тартиби

Иветт Купер ўз нутқида Марказий Осиёни барқарор ўсиш суръатларига эга, минтақавий кооперацияни кучайтираётган ва халқаро жараёнларда роли ортиб бораётган динамик ҳудуд сифатида таърифлади. У мамлакатлар ўртасида прагматик ёндашув ва ўзаро боғлиқликни мустаҳкамлаш муҳимлигини таъкидлади.

Муҳокамаларда Марказий Осиёнинг ресурс ва транзит салоҳиятини Британиянинг молия, технология, регулятор стандартлар ва таълим соҳаларидаги имкониятлари билан уйғунлаштириш масаласига алоҳида эътибор қаратилди.

«С5+UK» формати

Марказий Осиё давлатлари ташқи ишлар вазирлари «С5+UK» формати самарали ва тузилган мулоқот механизми эканини қайд этди. Бу формат минтақавий кун тартибини комплекс кўриб чиқиш ва умумий манфаатлар асосида ҳамкорликни ривожлантириш имконини беради.

Томонлар савдо, транспорт, инвестиция ҳамда замонавий хавф-хатарларга қарши ҳамкорликни кучайтириш бўйича янги қадамларни белгилаш зарурлигини таъкидлади. Қайд этилишича, «С5+UK» узоқ муддатли ва тизимли ҳамкорликни шакллантириш учун муҳим платформага айланиши кутилмоқда.