НКМКда олтин ишлаб чиқариш ҳажми 2,2 фоизга қисқарди

«Навоий кон-металлургия комбинати» 2026 йилнинг биринчи чораги учун операцион натижаларини эълон қилди. Маълумотларга кўра, корхона олтин ишлаб чиқариш ҳажмини ўтган йилнинг мос даврига нисбатан 2,19 фоизга камайтирган. Жорий йилнинг январ ва март ойлари оралиғида жами 737 минг трой унцияси миқдорида олтин қазиб олинган.

Бироқ, олтин ҳажмининг пасайиши комбинатнинг молиявий ҳолатига салбий таъсир кўрсатмади, аксинча даромад кескин ошди. Қимматбаҳо металлнинг жаҳон бозоридаги нархи кўтарилиши ҳисобига маҳсулот ишлаб чиқариш қиймати 58,3 фоизга ўсиб, 44 триллион сўмдан ошди. Бу кўрсаткич 2025 йилнинг биринчи чорагида 27,79 триллион сўмни ташкил этган эди.

Шунингдек, корхона инвестиция дастури доирасида 110,5 миллион доллар маблағ ўзлаштириб, салкам тўққиз юзта янги иш ўрни яратишга муваффақ бўлди. Бу эса ҳудуддаги бандлик масаласини ҳал этишга хизмат қилади. Комбинатнинг молиявий барқарорлиги ташқи бозордаги конъюнктурага боғлиқ бўлиб қолмоқда.

Йирик инвестиция лойиҳалари

Жорий йилда корхонада бир нечта йирик стратегик лойиҳаларни амалга ошириш давом эттирилмоқда. Хусусан, «Мурунтау» конини ўзлаштиришнинг бешинчи навбати доирасида 48,6 миллион метр кубдан ортиқ тоғ массаси қазиб олинди. У ерда конвейер линиялари қурилиши жадаллик билан олиб борилмоқда.

Шунингдек,еттинчи гидрометаллургия заводининг йиллик қувватини 25 миллион тоннага етказиш режалаштирилган. Ҳозирда муҳандислик коммуникация тармоқлари ва маиший бинолар қурилиши якунланмоқда. Мазкур қувватлар ишга тушгач, корхонанинг экспорт салоҳияти янада ортади.

Эслатиб ўтамиз, Навоий кон-металлургия комбинати 2025 йилда 98,2 тонна олтин ишлаб чиқарган. Ишлаб чиқарилган олтиннинг умумий қиймати 135,6 трлн сўмни, ёки тахминан 11,25 млрд долларни ташкил этган.