Ўзбекистон аҳоли бандлиги бўйича 187 та давлат орасида 114-ўринни эгаллади

Халқаро меҳнат ташкилотининг «Employment Index 2025» рейтингида Ўзбекистон 187 та давлат ичида 114-поғонадан жой олди. Мамлакатдаги бандлик кўрсаткичи 55 фоизни ташкил этмоқда. Бу кўрсаткич меҳнатга лаёқатли (15 ёш ва ундан катта) аҳолининг қанча қисми товар ишлаб чиқариш ёки хизмат кўрсатиш соҳасида ҳақ эвазига меҳнат қилаётганини ифодалайди.

Қўшниларда вазият қандай?

Рейтинг маълумотларига кўра, Марказий Осиё ва қўшни давлатлар орасида бандлик даражаси турлича:

• Қозоғистон — 29-ўрин (67 фоиз);

• Россия — 73-ўрин (60 фоиз);

• Қирғизистон — 111-ўрин (55 фоиз);

• Ўзбекистон — 114-ўрин (55 фоиз);

• Туркманистон — 165-ўрин (40 фоиз);

• Тожикистон — 175-ўрин (36 фоиз).

Рейтингнинг юқори поғоналарини Қатар (87 фоиз), Соломон ороллари (83 фоиз) ва Мадагаскар (83 фоиз) каби давлатлар эгаллаб турибди. Энг паст кўрсаткичлар эса Сомали (27 фоиз) ва Жибути (24 фоиз) каби мамлакатларда қайд этилган.

Бу кўрсаткич нимани англатади?

Халқаро меҳнат ташкилоти мутахассисларининг таъкидлашича, бандлик даражасининг юқори бўлиши ҳар доим ҳам мамлакатнинг иқтисодий бойлигидан далолат бермайди. Масалан, қатор ривожланаётган давлатлардаги юқори фоизлар аҳолининг асосан қишлоқ хўжалигида ўз-ўзини банд қилгани ёки норасмий секторда ишлаётгани билан изоҳланади.

Ўзбекистон эгаллаган 114-ўрин мамлакат иқтисодиётининг иш ўринлари яратиш салоҳиятини акс эттиради. Бироқ, бу индекс иш ҳақи миқдори ёки меҳнат шароитлари ҳақида маълумот бермайди.

Бандлик индекси қандай ҳисобланади?

Бандлик даражаси — бу меҳнатга лаёқатли аҳоли (15 ва ундан катта ёшдагилар) умумий сонининг қанча фоизи ҳақиқатда ишлаётганини кўрсатувчи кўрсаткичдир. Унга талабалар, уй бекалари ва маош олмасдан меҳнат қилаётган шахслар киритилмайди.