Ўзбекистон август ойида 8 тонна олтин сотиб олди

Ўзбекистон Марказий банки 2026-йил август ойида 8 тонна олтин сотиб олди. Натижада йил бошидан буён харид қилинган олтин ҳажми қарийб 50 тоннага етди. Бу ҳақда Жаҳон олтин кенгаши (WGC) маълумотларида келтирилган.

Кенгаш маълумотларига кўра, август ойида дунё марказий банклари жами 39 тонна олтин харид қилган. Йил бошидан буён эса марказий банкларнинг соф олтин харидлари 170 тоннани ташкил этган.

Август ойида энг кўп олтин харид қилган мамлакат Хитой бўлди. Унинг олтин захиралари 20 тоннага ошди. Кейинги ўринларни Ўзбекистон ва Польша эгаллади — ҳар икки мамлакат 8 тоннадан олтин сотиб олди. Қозоғистон захираларини 7 тоннага, Туркия 3 тоннага, Чехия эса 2 тоннага ошради.

Россия ва Иордания эса, аксинча, олтин захираларини қисқартирди. Улар август ойида мос равишда 6 тонна ва 3 тонна олтин сотди.

Ўзбекистоннинг олтин захиралари қарийб эса 439 тоннага етди. Олтин мамлакат халқаро захираларининг қарийб 90 фоизини ташкил этади.

Йил бошидан буён Польша етакчи

2026-йил бошидан буён марказий банклар орасида энг кўп олтин харид қилган мамлакат Польша бўлиб турибди. Унинг харидлари 98 тоннага етди. Хитой 80 тонна билан иккинчи, Ўзбекистон эса қарийб 50 тонна билан учинчи ўринни эгаллади.

Бошқа мамлакатлар орасида Қозоғистон ҳам олтин захираларини сезиларли даражада оширди. Йил бошидан буён унинг захиралари қарийб 36 тоннага кўпайди. Чехия эса 14 тонна олтин харид қилди.

Туркия, аксинча, йил бошидан буён олтинни энг кўп соф сотган мамлакат бўлиб қолмоқда. Унинг соф сотувлари 82 тоннани ташкил этди. Бу ҳажмнинг асосий қисми йилнинг биринчи чорагига тўғри келган.

Россия эса йил бошидан буён 56 тонна олтин сотган.

Аввалроқ Vaqt.uz Ўзбекистоннинг халқаро захиралари 2026-йил сентябрида олтин нархининг пасайиши ҳисобига 5,5 млрд долларга камайиб, 1-октябрь ҳолатига 66,6 млрд долларни ташкил этгани ҳақида ёзган эди. Аммо мамлакатнинг олтин захиралари жисмоний ҳажмда камаймаган.