Ўзбекистонда тўлов ташкилотлари сони 50 тага етди
Марказий банк томонидан шу кунгача жами 34 та бангга, 1 та микромолия банкига ва 50 та тўлов ташкилотига лицензия берилган.
© brb.uzМарказий банк маълумотларига кўра, Ўзбекистон молия бозорида тўлов хизматлари сегменти фаол ўсишда давом этмоқда. Ҳозирги кунда регулятор томонидан 34 та банк, 1 та микромолия банки ва 50 та тўлов ташкилотига расмий лицензия берилган.
Йил бошидан буён тўртта компанияга «тўлов ташкилоти» литсензияси тақдим этилган. Улар қаторига «DIGITAL PAY» АЖ, «PAYPOINT» АЖ, «WHIRL» АЖ ҳамда «ZAYTUN TECH» АЖ лар киради. Бу ҳолат мамлакатда рақамли молиявий хизматларга қизиқиш ва финтех экотизимининг кенгайиб бораётганини кўрсатмоқда.
Марказий банк маълумотларида қайд этилишича, рўйхатдан ўтган энг сўнгги тўлов ташкилоти сифатида «ZAYTUN TECH» акциядорлик жамияти фаолият юритади. Компанияга 67-сонли лицензия 2026-йил 6-март куни расмий равишда берилган ва у чекланмаган муддат учун амал қилади.
«ZAYTUN TECH» ҳақида
Корпоратив ахборот ягона портали маълумотларига кўра, «ZAYTUN TECH» 2023-йилда давлат рўйхатидан ўтган. Компания шу пайтгача банк ва молия соҳаси учун рақамли платформалар ҳамда дастурий ечимлар ишлаб чиқувчи финтех стартап сифатида фаолият олиб борган.
Компаниянинг устав капитали 20 млрд сўмни ташкил қилади. Унинг юридик манзили Тошкент шаҳри Яшнобод туманида жойлашган. Корхона бошқарув раиси Руслан Мамутов ҳисобланади.
Маълум қилинишича, компания томонидан молиявий операцияларни амалга оширишга мўлжалланган «ZAYTUN» мобил иловаси ишлаб чиқилган ва синов жараёнларидан ўтказилган.
Эслатиб ўтамиз, Марказий банк 2025-йил 6-ноябрь куни мамлакатдаги илк микромолия банки «TAYANCH MIKROMOLIYA BANKI» акциядорлик жамиятига фаолияти учун лицензия берганди. Шунингдек, Тожикистоннинг «Alif» финтех компанияси Ўзбекистонда микромолия банки очиш учун Марказий банкка ариза топширган.
