Ўзбекистонликлар техника таъмирига қанча маблағ сарфлагани маълум бўлди

2025 йилда Ўзбекистонда компьютерлар ва маиший товарларни таъмирлаш бўйича хизматлар ҳажми 2024 йилга нисбатан 20,7 фоизга кўп бўлиб, соҳа барқарор ўсиш босқичига кирганини кўрсатади. Бу ҳақда Миллий статистика қўмитаси маълум қилди.

Таҳлилларга кўра, хизматлар ҳажмининг ортиши аҳоли даромадларининг ўсиши, маиший техникадан фойдаланиш даражасининг кенгайиши ҳамда янги ускуналар нархининг қимматлашуви билан изоҳланмоқда. Бу эса таъмирлаш хизматларига бўлган талабни кучайтирган.

Энг юқори кўрсаткич

Ҳудудлар кесимида энг юқори кўрсаткич Самарқанд вилоятида қайд этилди — 1,8 трлн сўм. Шунингдек, Тошкент шаҳрида 1,7 трлн сўм, Тошкент вилояти ва Фарғона вилоятида 1,5 трлн сўмдан хизмат кўрсатилган. Қашқадарё вилоятида бу рақам 1,4 трлн сўмни ташкил этди.

Наманган вилоятида 1,1 трлн сўм, Хоразм вилоятида 995,1 млрд сўм, Андижон вилоятида 987,4 млрд сўмлик хизмат кўрсатилган. Қорақалпоғистон Республикасида 838,8 млрд сўм, Бухоро вилоятида 796,5 млрд сўм, Сурхондарё вилоятида 781,7 млрд сўм қайд этилди.

Энг паст кўрсаткич

Энг паст кўрсаткич Сирдарё вилоятида — 254,4 млрд сўм. Навоий вилоятида 344,3 млрд сўм, Жиззах вилоятида эса 468,2 млрд сўмлик хизматлар амалга оширилган. Умуман олганда, соҳа барча ҳудудларда ўсиш динамикасини намоён этмоқда.