Россия, Украина ва АҚШ ўртасидаги музокаралар Мединский сабабли «боши берк кўчага кириб қолди» — «Axios»

17 феврал куни Женевада бўлиб ўтган Россия, Украина ва АҚШ ўртасидаги навбатдаги музокаралар чоғида сиёсий гуруҳ «берк кўчага кириб қолган», ҳарбий гуруҳ эса «илгарилашга эришишда давом этган», деб хабар берди Axios нашри манбаларига таяниб.

Манбаларга кўра, бу ҳолат Россия музокара гуруҳи раҳбари Володимир Мединский баён этган позиция билан боғлиқ. Манбалардан бири Россия вакиллари Украина президенти Владимир Зеленскийнинг яқиндаги оммавий баёнотларидан норози бўлганини айтган. Уларнинг фикрича, Зеленский жиддий музокара олиб бормаяпти, балки «мумкин бўлган сайловлар олдидан мамлакат ичидаги оммабоплигини оширишга ҳаракат қилмоқда».

ТАСС музокаралар қарийб олти соат давом этгани ва унда «катта мавзулар ва катта муросалар» муҳокама қилинганини маълум қилди. Агентлик суҳбатдошининг сўзларига кўра, музокаралар «кескин руҳда» ўтган. Учрашувдан сўнг Владимир Мединский журналистлар олдида чиқиш қилмади.

Томонлар музокараларни 18 феврал куни давом эттириш ниятида.

АҚШ ва европаликлар билан алоҳида учрашув

Украина делегацияси раҳбари, Миллий хавфсизлик ва мудофаа кенгаши котиби Рутем Умеров АҚШ ва Европа ҳамкорлари — Франция, Буюк Британия, Германия, Италия ва Швейцария вакиллари билан алоҳида учрашувни якунлаганини маълум қилди.

«Бугунги музокаралар раунди якунларини муҳокама қилдик ва кейинги қадамлар бўйича ёндашувларимизни мувофиқлаштирдик. Украина, АҚШ ва Европа ўртасида ягона қараш ва ҳаракатларни мувофиқлаштиришни сақлаб қолиш муҳим.

Натижа учун умумий масъулият борлиги бўйича тушуниш мавжуд. Ишни давом эттиряпмиз», – деб ёзди Умеров.

Зеленский: украиналиклар тинчлик йўлида Донбассни «сотиш»га йўл қўймайди

Украина президенти Володимир Зеленский «Axios» нашрига берган интервюсида украин жамияти Донбасс ҳудудларидан воз кечишни назарда тутувчи ҳар қандай келишувни қабул қилмаслигини ва уларни тинчлик эвазига «топшириш»га йўл қўймаслигини айтди. Зеленскийнинг сўзларига кўра, америкалик воситачилар унга Россия томонидан «урушни тугатишга ҳақиқий истак» борлиги ҳақида сигналлар етказган ва шу асосда музокара гуруҳи билан позицияни мувофиқлаштиришни тавсия қилган. Аммо Украина президентининг ўзи бунга нисбатан анча шубҳали муносабатда бўлиб, украиналиклар «омадсиз ҳикоя» деб баҳолайдиган тинчлик режасини унга мажбуран қабул қилдиришга уринишдан воситачиларни огоҳлантирган.

«Ҳиссий жиҳатдан одамлар бундай нарсани ҳеч қачон кечирмайди. Ҳеч қачон. Бу бизнинг мамлакатимизнинг бир қисми, у ердаги барча фуқаролар, байроқ, ер – ҳаммаси бизники», – деб таъкидлади Зеленский ҳудудлардан эҳтимолий воз кечиш ҳақида гапирар экан.

У Доналд Трамп томонидан очиқдан-очиқ муросага айнан Украинани чақириш «адолатсиз» эканини айтди, гарчи тинчликни йўлга қўйишдаги саъй-ҳаракатлари учун унга миннатдорлик билдирган бўлса-да.

«Умид қиламан, бу фақат унинг тактикаси, қабул қилинган қарор эмас», – деди Зеленский ва босим остида таслим бўладиган инсонлардан эмаслигини қўшимча қилди.

Президентнинг айтишича, Вашингтон ва Киев якуний ҳар қандай келишув референдумга қўйилишига келишиб олган. Агар ҳужжат фақат украин қўшинларини олиб чиқишни ва Донбасснинг бир қисми устидан суверенитетнинг амалда йўқотилишини назарда тутса, жамият уни рад этади. Айни пайтда, фронтнинг ҳозирги чизиғини музлатиш варианти, Зеленскийнинг фикрича, қўллаб-қувватланиши мумкин:

«Агар ҳужжатга мавжуд тўқнашув чизиғига риоя қилиш банди киритилса, одамлар бунга референдумда овоз беради».

Америкалик воситачилар Донбассда суверенитет мақоми аниқланмаган демилитаризация қилинган «эркин иқтисодий зона» яратиш вариантини таклиф этган. Зеленский қўшинларни ўзаро қайтариш масаласини муҳокама қилишга тайёр эканини айтган, аммо бу ҳудуд устидан Россия суверенитетини тан олишни қатъий рад этган.

Алоҳида таъкидлаб, у яна бир бор муаммони ҳал қилиш калити – Владимир Путин билан шахсий учрашув эканини билдирди. Унинг сўзларига кўра, у ўз жамоасига етакчилар даражасидаги бўлажак учрашув масаласини Женевада кўтаришни топширган. Шу билан бирга, Зеленский Россия делегацияси раҳбарининг алмашиши жараённи чўзиб юбориши мумкинлигидан хавотир билдирди.

«Бизнинг бундай аҳмоқона гап-сўзларга вақтимиз йўқ. Шунинг учун қарор қабул қилишимиз ва урушни тугатишимиз керак», – деди у, рақиб томоннинг можаронинг «тарихий илдизлари» ҳақида мулоҳаза юритишга мойиллигини шарҳлар экан.

Шунингдек, президент эҳтимолий сулҳ даврида референдум билан бир вақтда янги сайловлар ўтказилиши мумкинлигини ҳам истисно этмади ва унда ўз иштирокини ҳам рад қилмади:

«Бу халққа боғлиқ бўлади. Улар нимани исташини кўрамиз».