Шавкат Мирзиёев ШҲТнинг Бишкек саммитида иштирок этади

Ўзбекистон президенти Шавкат Мирзиёев Қирғизистон президенти Садир Жапаровнинг таклифига биноан 31-август — 1-сентябр кунлари амалий ташриф билан Бишкек шаҳрида бўлади.

Давлат раҳбари Шанхай ҳамкорлик ташкилотига аъзо давлатлар раҳбарлари кенгашининг навбатдаги йиғилишида иштирок этади. Шунингдек, «ШҲТ плюс» форматидаги учрашувда ҳам қатнашади.

Саммит кун тартибидан ташкилот доирасидаги кўп қиррали ҳамкорликни янада ривожлантириш ва ШҲТ фаолиятини такомиллаштиришга оид долзарб масалалар ўрин олган. Халқаро ва минтақавий ҳамкорлик мавзулари ҳам муҳокама қилинади.

Йиғилиш якунида ШҲТнинг 25 йиллигига бағишланган Бишкек декларацияси ҳамда хавфсизлик, иқтисодиёт, транспорт, экология, сунъий интеллект, маданий-гуманитар алмашинув ва ҳамкорликнинг бошқа кўплаб йўналишларида шерикликни кенгайтиришга қаратилган ҳужжатлар тўпламини қабул қилиш режалаштирилган.

Саммит доирасида Президент Шавкат Мирзиёев хорижий делегациялар раҳбарлари билан қатор икки томонлама учрашувлар ўтказади.

Ташриф дастурига мувофиқ, Ўзбекистон етакчиси VI Бутунжаҳон кўчманчилар ўйинларининг очилиш маросимида ҳам иштирок этади.