Таиланд самолётларида повербанкларга янги қатъий чеклов жорий этилди

Таиланд Фуқаро авиацияси бошқармаси (CAAT) самолёт бортларида повербанклардан фойдаланиш бўйича қоидаларни кескин кучайтирди. Янги тартибга кўра, йўловчилар парвоз вақтида телефон ёки бошқа электрон қурилмаларни повербанк орқали қувватлай олмайди.

Қоидаларга мувофиқ, повербанклар фақат қўл юкида ташилиши мумкин. Уларни рўйхатдан ўтказиладиган багажга жойлаштириш тақиқланди. Шунингдек, қурилманинг қуввати 100 Whдан ошмаслиги лозим.

Регулятор маълумотига кўра, ҳар бир йўловчи ўзи билан кўпи билан иккита батарея олиб чиқиши мумкин. Бортда повербанкнинг ўзини ҳам зарядлашга рухсат берилмайди.

Хавфсизлик чоралари

Янги қоидаларга биноан, повербанкларни юқоридаги багаж жавонларида сақлаш мумкин эмас. Улар осон етиб бориладиган жойларда, жумладан ўриндиқ остидаги бўшлиқда ёки ўриндиқ чўнтагида сақланиши шарт.

Агар қурилма қуввати 100 Whдан юқори бўлса, лекин 160 Whдан ошмаса, уни олиб ўтиш учун авиакомпаниянинг алоҳида рухсати талаб қилинади.

«Bangkok Post» нашрининг ёзишича, мазкур қарор самолётларда повербанклар қизиб кетиши ёки ёнғин чиқариши билан боғлиқ бир қатор ҳодисалардан кейин қабул қилинган. Авиация соҳасида литий-ион батареялар хавфсизлиги сўнгги йилларда долзарб масалага айланган.

Глобал тенденция

Таиланднинг қарори халқаро авиацияда кузатилаётган умумий тенденциянинг бир қисми сифатида баҳоланмоқда. 2026 йил апрелида Япония ҳам самолётларда батареялардан фойдаланиш бўйича чекловлар жорий этган эди.

«The Japan Times» маълумотига кўра, қоидаларни бузганларга дастлаб огоҳлантириш берилади, кейин эса 1 миллион иенагача жарима қўлланиши мумкин.

Бундан аввал «Emirates» авиакомпанияси ҳам повербанклардан фойдаланишни тақиқлаган. Шунингдек, «Turkish Airlines», «Pegasus» ва Жанубий Кореянинг «Air Busan» авиакомпаниялари юқори багаж жавонларида повербанк сақлашни чеклаган.