«TikTok» АҚШдаги бўлинмаси акцияларининг ярмини сотди

«TikTok» платформасига эгалик қилувчи Хитойнинг «ByteDance» технологик компанияси АҚШдаги бўлинманинг бир қисмини АҚШлик инвесторларга ўтказиш бўйича келишувни якунлади. Бу ҳақда «Bloomberg» агентлиги хабар берди.

Маълум қилинишича, «Oracle», «Silver Lake» ва «MGX» каби янги инвесторлар «TikTok»нинг АҚШдаги компанияси акцияларининг 50 фоизига эгалик қилади. «ByteDance»нинг мавжуд инвесторлари 30,1 фоизни, бевосита «ByteDance» эса 19,9 фоизни назорат қилади.

Агентлик аниқлашича, америкалик вакилларнинг иштироки «TikTok»да контентни модерация қилиш ва АҚШ фойдаланувчиларининг маълумотларини ҳимоя қилиш имконини беради. Бўлинманинг янги директорлар кенгаши етти нафар аъзодан иборат бўлиб, уларнинг кўпчилиги АҚШ фуқароларидир. «ByteDance» эса «TikTok»нинг АҚШдаги реклама бўлинмаси ҳамда «TikTok Shop» электрон тижорат бўлинмаси устидан назоратни сақлаб қолади.

АҚШ Президенти Доналд Трамп «Truth Social» ижтимоий тармоғида эндиликда «TikTok» «улуғ америкалик ватанпарварлар ва инвесторлар гуруҳи»га тегишли бўлишини ёзди. У Хитой Халқ Республикаси раиси Си Жинпингга келишувни маъқуллагани учун миннатдорлик билдирди.

«У бошқача йўл тутиши мумкин эди, аммо бундай қилмади ва унинг қарори эътирофга лойиқ», — деб қўшимча қилди Трамп.

«TikTok»ни тахминан 200 миллион нафар америкалик фойдаланувчи ишлатади. 2024 йилда АҚШ Конгресси «ByteDance» «TikTok»ни сотмаса, платформани блоклаш тўғрисида қонун қабул қилди. Бунга сабаб сифатида Хитой ҳукумати маълумотларга кириш имкониятини суиистеъмол қилиши ёки иловадан Пекин маъқул кўрадиган нарративларни илгари суриш учун фойдаланиши мумкинлиги ҳақидаги хавотирлар кўрсатилди. Дастлаб сотув бўйича келишув 2025 йил январга қадар тузилиши керак эди, аммо АҚШ президенти Доналд Трамп келишувни якунлаш муддатини бир неча бор узайтирди.