Трамп энг обрўсиз президентга айланди

АҚШ президенти Доналд Трампнинг рейтинги тарихий минимум даражага тушди.

«The Economist» журнали ва «YouGov» социологик институти ўтказган тадқиқот натижаларига кўра, Трамп 2009 йилдан буён энг паст қўллаб-қувватлаш кўрсаткичига эга президент сифатида қайд этилди.

Сўровномага кўра, айни пайтда Трампни қўллаб-қувватлашнинг соф кўрсаткичи минус 24 фоизни ташкил қилмоқда. Бу рақам сўнгги бир ҳафта ичида яна 1,9 пунктга ёмонлашган.

Ҳозирда америкаликларнинг 34 фоизи президент фаолиятини маъқуллаётган бўлса, 58 фоизи унинг сиёсатига салбий баҳо берган. Яна 8 фоиз респондент аниқ фикр билдирмаган.

Обрўсизланиш сабаблари

Таҳлилчиларнинг фикрича, рейтингнинг кескин пасайишига бир нечта омил таъсир кўрсатган. Улар орасида ташқи сиёсатдаги мураккаб вазият ва иқтисодий соҳадаги муаммолар асосий ўринни эгалламоқда.

Хусусан, Эрон билан боғлиқ ҳарбий ҳаракатлар атрофидаги баҳслар ҳамда иқтисодий жараёнларни бошқариш бўйича қарорлар жамоатчилик норозилигини кучайтирган.

Таянч ҳудудларда ҳам пасайиш

«YouGov» маълумотларига кўра, Трампга нисбатан салбий муносабат нафақат рақиблар орасида, балки унинг анъанавий қўллаб-қувватловчилари яшайдиган ҳудудларда ҳам кучаймоқда.

Таҳлилчиларнинг таъкидлашича, 2024 йилги президентлик сайловларида Трамп ғалабасини таъминлаган айрим штатларда ҳам норозилик кайфияти кучаймоқда.