Херсон яқинида кема чўкди: экипаж қурбонлари бор

Буғдой юкланган кема Азов денгизида, Херсон области соҳиллари яқинида чўкиб кетди, қуруқ юк ташувчи кеманинг 11 нафар экипаж аъзосидан икки нафари ҳалок бўлди. Бу ҳақда бугун, 5-апрел куни Россия давлат ахборот агентлиги «ТАСС» оператив хизматларга таяниб хабар қилди.

«Азов денгизида чўккан қуруқ юк кемасининг 9 нафар экипажи капсула-қайиққа ўтиб, Херсон областига етиб олди», – дейилади агентлик хабарларидан бирида.

Кема Керчдан шимол томонда 300 миля (480 км) масофада чўкиб кетгани қайд этилган.

Агентлик манбаларига кўра, кема «дрон ҳужуми натижасида» чўккан. Хабар эълон қилинган пайтда Украина Қуроллии кучлари бош штаби ҳам, Россия Мудофаа вазирлиги ҳам ушбу ҳодиса юзасидан изоҳ бермаган.

Бир неча соат олдин Россия томонидан тайинланган «губернатор» Владимир Салдо «Telegram» орқали Азов денгизи акваториясида буғдой юкланган «Волго-Балт» туридаги кема ҳалокатга учраганини маълум қилган. Экипаж кема бортин тарк этиб, Херсон области соҳилига етиб олган.

«Соҳилда РФ фуқаролари бўлган 9 нафар экипаж аъзоси топилди», – дейди у.

Унинг версиясига кўра, кемада 12 нафар россиялик бўлган, фақат капитаннинг катта ёрдамчиси (1991-йил туғилган) ҳалок бўлган, яна икки киши бедарак йўқолган.

Таганрогга ракетали зарба берилди

Ростов области губернатори Юрий Слюсарнинг айтишича, 5-апрелга ўтар кечаси Таганрогга ракета ва дронлар билан ҳужум қилинган. Унинг сўзларига кўра, бир киши ҳалок бўлган, тўрт киши жароҳат олган, улар орасида «чет эл фуқароси» ҳам бор. Уч нафар жабрланганнинг аҳволи оғир деб баҳоланган.

Ракета зарбаси натижасида Таганрогда тижорат инфратузилмасига зарар етган, логистика компанияси омборларидан бирида ёнғин келиб чиққан.

«Қўлтиқ акваториясида (Азов денгизи) дрон парчалари тушиши натижасида тижорат кемасига зарар етди ва ёнғин юз берди. Чет эл байроғи остидаги қуруқ юк кемаси соҳилдан бир неча километр узоқликда бўлган», – дея қўшимча қилди у.