Хитой, АҚШ ва Ҳиндистон 2030-йилгача жаҳон иқтисодий ўсишининг қарийб ярмини таъминлаши мумкин
2030-йилгача деярли барча иқтисодиётлар ўсиши кутилмоқда. Бироқ янги ишлаб чиқариш ҳажмининг асосий қисми чекланган сондаги мамлакатлар ҳиссасига тўғри келади.
Келгуси беш йил давомида жаҳон ялпи ички маҳсулоти ўсишининг қарийб ярми Хитой, АҚШ ва Ҳиндистон ҳиссасига тўғри келиши кутилмоқда. Бу ҳақда «Visual capitalist» рейтингида сўз боради.
Қандай прогнозлар берилмоқда?
Таҳлилларга кўра, 2030-йилгача деярли барча иқтисодиётлар ўсиши кутилмоқда. Бироқ янги ишлаб чиқариш ҳажмининг асосий қисми чекланган сондаги мамлакатлар ҳиссасига тўғри келади.
Рейтинг 2026-2030-йиллар оралиғида қайси мамлакатлар жаҳон ялпи ички маҳсулотига энг катта ҳисса қўшиши кутилаётганини кўриб чиқади. У Халқаро валюта жамғармаси (IMF)нинг Жаҳон иқтисодий кўриниши (World Economic Outlook, WEO) ҳисоботи прогнозларига асосланган.
Муҳими, бу рақамлар инфляцияни ҳисобга олган реал ўсишни эмас, балки АҚШ долларидаги номинал ЯИМ ўсишини акс эттиради.
Иқтисодиётлар ўсиши
Хитой (+5,7 трлн АҚШ доллари), АҚШ (+5,0 трлн АҚШ доллари) ва Ҳиндистон (+2,1 трлн АҚШ доллари) 2030-йилгача жаҳон ялпи ички маҳсулотига қўшиладиган умумий қўшимча ҳажмнинг қарийб ярмини – 49,7 фоизини таъминлаши кутилмоқда.
Халқаро валюта жамғармаси прогнозларига кўра, келгуси беш йил ичида Суринам дунёдаги энг тез ўсадиган иқтисодиётга айланади, мамлакат ЯИМи 137 фоизга ўсиши мумкин.
Хитой ва АҚШ абсолют ўсиш бўйича етакчи
Умумий қўшимча ЯИМ ҳажми бўйича Хитой биринчи ўринни эгаллайди. Прогнозларга кўра, 2026-2030-йиллар оралиғида мамлакат иқтисодиёти 5,7 триллион долларга ошади.
