Европа Украина бўйича музокараларда адолатли тинчлик зарурлигини айтди

Европанинг етакчи давлатлари Лондонда ўтган музокараларда Украина учун адолатли ва барқарор тинчликка эришиш зарурлигини таъкидлади. Учрашувда Буюк Британия бош вазири Кийр Стармер, Франция президенти Эммануэл Макрон, Германия канцлери Фридрих Мерц ҳамда Украина президенти Володимир Зеленский иштирок этди. Европа раҳбарлари Киевни қўллаб-қувватлашни давом эттиришини билдириб, музокаралар босқичини «тинчлик жараёнидаги ҳал қилувчи палла» деб атади.

Кийр Стармернинг таъкидлашича, Украинага оид қарорларнинг барчасини айнан Украинанинг ўзи қабул қилиши керак. У тинчлик музокараларини жиддий босқич сифатида баҳолаб, тинчлик фақат узоқ муддатли ва адолатли бўлиши шартлигини қайд этди. Володимир Зеленский Европа ва АҚШ бирлиги Украина учун ҳал қилувчи аҳамиятга эга эканини айтиб, глобал шериклар ўртасидаги ёндашувларни яқинлаштириш талаб этилишини билдирди.

Франция президенти Эммануэл Макроннинг сўзларига кўра, Россия иқтисодиёти Европа томонидан жорий этилган сўнгги санкциялардан сезиларли даражада жабр кўрмоқда. У Европа мамлакатларининг қўлида «кўзирлар борлигини» таъкидлаб, Киевга кўрсатилаётган сиёсий ва иқтисодий ёрдамнинг давом эттирилишини таъкидлади.

Германия канцлери Мерц эса Вашингтондан келаётган ҳужжатлардаги айрим бандларга шубҳа билан ёндашди, аммо Украина тақдири Европа тақдири билан узвий боғлиқ бўлгани учун Берлин қўллаб-қувватлашни тўхтатмаслигини билдирди.

Володимир Зеленский музокаралардан кейинги баёнотида АҚШ Президент Доналд Трампнинг урушни тугатиш бўйича ўз қарашлари борлигини, улар Украина позициясидан фарқ қилишини айтди.

Украина раҳбарининг таъкидлашича, хавфсизлик кафолатлари фақат АҚШ Конгресси тасдиғини олгандан кейин ҳақиқий кучга эга бўлади. Зеленский шунингдек, АҚШ ва НАТОнинг PURL дастури бўйича қурол-яроқ харидлари учун ажратиладиган маблағ 2025 йил учун 100 млн долларгача қисқартирилганини, 2026 йил учун эса 15 млрд доллар зарур бўлишини маълум қилди.

Украина президенти ҳеч қандай ҳолатда ҳудудий имтиёзлар эвазига хавфсизлик кафолатлари муҳокама қилинмаслигини қатъий билдирди. Унинг айтишича, Кушнер ва Уиткофф урушни тўхтатиш бўйича иш олиб бормоқда, аммо Киев учун энг асосий масала — тинчлик қандай шартларда таъминланиши.

Зеленский АҚШ қурол етказиб беришни давом эттиришини, бу америкаликлар манфаатларига ҳам мос келишини қўшимча қилди.

Украина раҳбари фронтдаги вазият осон эмаслигини тан олди, бироқ ҳозирча душман томонидан ишғол этилмаган ҳудудлар учун пессимистик қараш билдирмасликни сўради. Унинг таъкидлашича, Россия армиясининг муваффақиятли илгарилаётгани ҳақидаги тасаввур ҳаддан ташқари бўрттирилган, Украина мудофаа салоҳияти эса ҳали ҳам юқори даражада.