Энергетика уруши: АҚШ Россия нефтига 500 фоизлик бож жорий қилмоқчи
Молия вазирлиги бу чорани Россия иқтисодиётини бўғишнинг самарали йўли деб билади.
АҚШ Россиянинг барча энергия ресурслари экспортига мисли кўрилмаган зарба беришга тайёрланмоқда. АҚШ Молия вазири Скотт Бессентнинг сўзларига кўра, Вашингтон Россиядан келадиган нефт ва газга 500 фоизгача бож жорий этишни режалаштирмоқда. Мазкур чора Москвани асосий валюта тушуми манбаларидан бутунлай узиб қўйишга қаратилган янги санкциялар пакетининг бир қисми бўлади.
Бессентнинг таъкидлашича, Трамп Россияга нисбатан бундай кескин чораларни қўллаши учун алоҳида қонун қабул қилиши шарт эмас — амалдаги ҳуқуқий воситаларнинг ўзи етарли.
Bloomberg агентлиги хабарларига кўра, ўтган ҳафта Доналд Трамп сенаторлар Линдси Грэм ва Ричард Блюментал томонидан тайёрланган санкциялар пакетига «яшил чироқ» ёққан. Лойиҳада Россия нефти, гази ва урани экспорти учун ўта юқори божлар жорий этиш кўзда тутилган. Ҳужжатларда тарифларнинг аниқ миқдори кўрсатилмаган бўлса-да, Fox News манбалари уларни «мисли кўрилмаган даражада юқори» деб атамоқда — бу Москвани асосий даромадлардан маҳрум қилиш учун етарли даражада кучли зарба бўлади.
Қайд этилишича, асосий мақсад сифатида бугунги кунда Россия ёқилғисининг қарийб 75 фоизини сотиб олаётган Хитой ва Ҳиндистонга зарба бериш кўрсатилган. Телеканалнинг қайд этишича, қонун лойиҳаси муаллифлари ушбу маблағларсиз Кремл Украинадаги ҳарбий ҳаракатларни молиялаштира олмаслигига ишонади.
Трамп ушбу ташаббусни очиқчасига қўллаб-қувватлаб, унинг зарурий эканини таъкидлаган. Бироқ, ҳужжатнинг Конгрессдаги йўли мураккаблигича қолмоқда. Сенатдаги етакчи Жон Тун бюджетга эҳтимолий оқибатлар туфайли қонунни кўриб чиқиш Вакиллар палатасидан бошланиши кераклигини айтган. Спикер Майк Жонсон ҳозирча қонун лойиҳаси бўйича ўз фикрини билдирмаган. Молия вазири Бессент эса Трампга Вакиллар палатасининг розилиги керак бўлмаслигини, у санкцияларни президент фармони орқали жорий этиши мумкинлигини таъкидлаган.
