Нобел қўмитаси тинчлик мукофотини Трампга топширишни рад этди

Норвегия Нобел қўмитаси тинчлик бўйича Нобел мукофотини бошқа шахсга, жумладан АҚШ президенти Дональд Трампга ўтказиш имкониятини қатъий рад этди. Қўмита бу қарорни Нобел жамғармаси Низомининг 10-бандига таяниб изоҳлаб, мукофот бир марта берилгач, у абадий кучда қолишини таъкидлади.

Қўмита баёнотида қайд этилишича, мукофот берувчи ташкилот қарори устидан шикоят қилиш мумкин эмас. Шунингдек, Нобел мукофоти на қайтариб олинади, на тақсимланади ва на бошқа шахсларга топширилади. Қарор эълон қилинганидан кейин у ўзгармас ҳисобланади.

Аниқлик киритилар экан, қўмита Стокголм ва Ослода фаолият юритувчи мукофот берувчи идоралар ҳозиргача бирор лауреатдан мукофотни қайтариб олиш масаласини кўриб чиқмаганини билдирди. Бироқ бу ҳолат қўмита лауреатларнинг кейинги фаолиятини кузатмаслигини англатмайди, дейилади баёнотда.

2025 йил октябр ойида тинчлик бўйича Нобел мукофоти Венесуэла мухолифати етакчиси Мария Корина Мачадога «Венесуэлада демократияни тарғиб қилиш йўлидаги саъй-ҳаракатлари учун» топширилган эди. Доналд Трамп ҳам ушбу мукофотга номзод сифатида кўрсатилган, аммо ғолиб бўлмаган.

2026 йил 3 январ куни АҚШ президенти топшириғи билан Венесуэла президенти Николас Мадуро ва унинг рафиқаси қўлга олиниб, Ню-Йоркка олиб кетилгани ҳақида хабар тарқалди. Уларга нисбатан нарко-терроризм айблови қўйилгани айтилди.

Мазкур операциядан кейин ўтказилган матбуот анжуманида Трамп Мачадонинг етакчилик салоҳиятига шубҳа билдириб, уни мамлакатни бошқариш учун етарли тажрибага эга эмас, деб баҳолади. Шу воқеалар ортидан Мачадо 6 январ куни тинчлик бўйича Нобел мукофотини Трампга топширишга тайёр эканини маълум қилди.

Унинг бу баёнотидан сўнг 9 январ куни АҚШ президенти Мачадони Венесуэлани бошқариш жараёнларига жалб этиш мумкинлигини билдирди. Айнан шу фон ортида Норвегия Нобел қўмитаси ўзининг қатъий позициясини эълон қилди.