Россия дрон ишлаб чиқариш учун Хитойдан оптик тола сотиб олмоқда
Россиянинг Хитойдан оптик тола харидлари мамлакатдаги ягона завод тўхтатилганидан сўнг кескин ошди. Россиялик харидорлар учун маҳсулот нархи 2,5–4 бараварга кўтарилди.
© NURPHOTO VIA AFPРоссия 2025 йилда Хитойдан оптик тола импортини кескин оширди, ишлаб чиқарувчилар эса бу маҳсулот нархини россиялик харидорлар учун 2,5–4 бараварга оширган. Бу ҳақда бугун, 26 феврал куни «Ведомости» хабар берди.
Пекин почта ва телекоммуникациялар университети ҳузуридаги Оптик-тола кабеллари тадқиқот маркази таҳлилчиси Чун Шэн баҳосига кўра, Россия ўтган йили мутлақ кўрсаткичда қарийб 60 млн километр оптик тола истеъмол қилган.
«ComNews Group» бош директори Леонид Коникнинг айтишича, Россияда оптик толанинг ўз ишлаб чиқариши қолмаган. Саранск шаҳридаги ягона завод «Оптиковолоконные системы» 2025 йил апрел–май ойларида украин дронлари ҳужумлари ортидан тўхтатилган. Энди мамлакат тўлиқ Хитой етказиб берувчиларига боғлиқ бўлиб қолган, улар жаҳон ишлаб чиқаришининг 60 фоиздан ортиғини ташкил этади.
Оптик толага бўлган талабнинг кескин ошиши унинг қимматлашишига олиб келди. Алоқа операторлари кабелларида ишлатиладиган G.652D маркали тола 2025 йил бошида бир километр учун 16 юан бўлган бўлса, 2026 йил январ ойида 40 юанга етган.
Дронлар ва дата-марказлар
Талаб ошишининг асосий сабаби – ҳарбий қўлланиш. 2025 йилда Россия ва Украина FPV-дронларни оптик тола орқали бошқаришни фаол жорий эта бошлади – бундай учувчисиз қурилмаларни аниқлаш қийин ва радиоэлектрон кураш воситалари билан бостириб бўлмайди. Қўшимча талаб манбаи сифатида сунъий интеллект вазифалари учун дата-марказлар эгалари ҳам қайд этилган.
2025 йил кузида «The Washington Post» газетаси Хитой компаниялари россиялик дрон ишлаб чиқарувчиларига литий-ион батареялар етказиб беришни ҳам оширганини хабар қилган эди. Оптик толанинг муқобил етказиб берувчилари бўлган АҚШ ва Япония санкциялар туфайли Россия учун ёпиқ.
