«Улар бизнинг нефтимизни тортиб олди»: Трамп АҚШнинг Венесуэладаги кескин режасини эълон қилди

Америка Қўшма Штатлари Венесуэла «ноқонуний равишда олиб қўйган» нефтни қайтариб олмоқчи. Бу ҳақда АҚШ президенти Доналд Трамп журналистларга берган интервюсида маълум қилди.

«Бу блокада. Биз ўтишга ҳаққи бўлмаган ҳеч кимни ўтказмаймиз. Унутманг, улар бизнинг энергия ресурсларига бўлган барча ҳуқуқларимизни тортиб олишди. Яқиндагина барча нефтимизни олиб қўйишди ва биз уни қайтаришни истаймиз. Улар буни ноқонуний йўл билан амалга оширишди», - деди у.

Маълумот учун: дунё бўйича тасдиқланган нефт захираларининг қарийб 20 фоизи Венесуэла ҳиссасига тўғри келади — бу тахминан 300 млрд баррел. Саудия Арабистони, Эрон ва Ироқнинг ҳар бирига тахминан 200 млрд баррелдан тўғри келади. Россия ушбу рўйхатда саккизинчи ўринни эгаллаб турибди — қарийб 80 млрд баррел ёки жаҳон захираларининг 5 фоизи. АҚШнинг улуши ҳам шунга яқин — 74 млрд баррел (тахминан 4 фоиз).

Аввалроқ, Трамп АҚШ санкцияларига тушган ва Венесуэлага йўл олган ёки у ердан чиқаётган барча нефть танкерларига нисбатан тўлиқ блокада жорий этилишини маълум қилган эди. Республикачи Трамп Вашингтон Венесуэла ҳукуматини активларни ўғирлаш, терроризм, наркотрафик ва одам савдосида айблаб, уларни хорижий террорчи ташкилот сифатида кўришини билдирганди.

Ноябр ойида АҚШ Кариб ҳавзасига эсминецлар ва десант кемаларидан иборат ҳарбий гуруҳни жойлаштирди. Ҳудуддаги Америка ҳарбий контингенти сони 16 минг кишига етди. Декабр ойида уларга Кариб денгизининг жанубий қисмида жойлашган USS Gerald R. Ford авиаташувчиси қўмондонлиги остидаги зарба берувчи гуруҳ ҳам қўшилди.