Яқин Шарқдан 21 мингдан ортиқ ўзбекистонлик қайтарилди
Уруш шароитида Яқин Шарқ давлатларидан Ўзбекистонга эвакуация қилинган фуқаролар сони 21 мингдан ошди.
9-март соат 07:00 ҳолатига кўра, Яқин Шарқдаги кескин вазият фонида Ўзбекистонга жами 21 712 нафар фуқаро қайтарилди. Бу ҳақда Ташқи ишлар вазирлиги маълум қилди.
Қайд этилишича, фуқароларни мамлакатга олиб келиш ишлари босқичма-босқич ва тизимли равишда амалга оширилмоқда.
Вазирлик маълумотига кўра, эвакуация асосан фуқаролик авиацияси учун ҳаво ҳудуди очиқ бўлиб турган давлатлар орқали ташкил этилмоқда. Бу мамлакатлар орқали транзит парвозлар амалга оширилиб, ўзбекистонликлар хавфсиз тарзда ватанга қайтарилмоқда.
Статистикага кўра, энг кўп фуқаро Саудия Арабистони орқали қайтарилган. Ушбу мамлакатдан 17 963 нафар ўзбекистонлик эвакуация қилинган. Шунингдек, Бирлашган Араб Амирликларидан 3 290 нафар фуқаро Ўзбекистонга олиб келинган.
Бундан ташқари, Эрондан 47 нафар, Қатардан 378 нафар, Баҳрайндан 27 нафар ва Ўмондан 7 нафар фуқаро қайтарилган. Ташқи ишлар вазирлигига кўра, эвакуация жараёнлари халқаро ҳамкорлар ва дипломатик ваколатхоналар билан ҳамкорликда ташкил этилмоқда.
«Ватандошларимизни Ўзбекистонга қайтариш бўйича чора-тадбирлар тизимли ва босқичма-босқич амалга оширилмоқда», — дейилади вазирлик хабарида.
Айни пайтда репатриация ишлари асосан фуқаролик авиацияси учун ҳаво ҳудуди очиқ бўлиб турган мамлакатлар орқали амалга оширилмоқда.
Эслатиб ўтамиз, 8 март ҳолатига кўра, Яқин Шарқ давлатларидан Ўзбекистонга жами 19 347 нафар фуқаро қайтарилган эди.
