2025 йилда қайси компаниялар энг кўп солиқ ва божхона имтиёзини олган?
2025 йилда Ўзбекистондаги компаниялар умумий қиймати 178,1 трлн сўмлик солиқ ва божхона имтиёзларидан фойдаланган.
2025 йил якунларига кўра, Ўзбекистонда корхона ва ташкилотларга тақдим этилган солиқ ва божхона имтиёзлари умумий ҳажми 178,1 трлн сўмни ташкил этди. Бу ҳақда Коррупцияга қарши курашиш агентлиги таҳлиллари орқали маълум қилинди.
Қайд этилишича, ушбу маблағнинг 119 трлн сўми солиқ имтиёзлари, 59,1 трлн сўми эса божхона имтиёзлари ҳиссасига тўғри келади. Натижада мазкур маблағлар корхоналар ихтиёрида қолдирилиб, уларнинг молиявий барқарорлигини таъминлашга хизмат қилган.
Солиштирмада, 2023 йилда бу кўрсаткич 127,1 трлн сўмни ташкил этган бўлса, 2024 йилнинг биринчи ярмида 63,4 трлн сўм қайд этилган.
Энг йирик бенефициарлар
Солиқ имтиёзларидан энг кўп фойдаланган компания — «Uzbekistan GTL» бўлиб, унга 2,8 трлн сўмлик енгиллик берилган. Кейинги ўринларда «Uzbekistan Airways» (2,4 трлн сўм) ва «O‘zbekneftgaz» (1,7 трлн сўм) жой олган.
Шунингдек, «O‘zbekiston temiryo‘llari» 1,1 трлн сўм ва «UzAuto Motors» 899 млрд сўмлик солиқ имтиёзларини олган ҳолда кучли бешликдан жой олди.
Божхона имтиёзлари бўйича эса «UzGasTrade» етакчи бўлиб, 2,1 трлн сўмлик имтиёзлардан фойдаланган. Ундан кейин «RWS Optimum» (1,4 трлн сўм) ва «Enter Engineering»нинг Қораўзак ИЭС лойиҳаси (1,1 трлн сўм) келади.
Маълумотларга кўра, божхона имтиёзларидан доимий равишда энг кўп фойдаланган бешта ташкилотдан тўрттаси «Enter Engineering» билан боғлиқ тузилмалар ҳисобланади. Улар умумий ҳисобда 1,8 трлн сўмдан ортиқ имтиёзларни ўзлаштирган.
Шунингдек, «Asia Trans Gas» 860 млрд сўмлик, «My Freighter» 660 млрд сўмлик ва «Humo» тўлов тизими 542 млрд сўмлик солиқ имтиёзларидан фойдаланган.
Божхона имтиёзлари олувчилар орасида «Trest 12» (519 млрд сўм) ва «Gorilla Energy»» (414 млрд сўм) ҳам қайд этилди. Ушбу кўрсаткичлар мамлакатда йирик инфратузилма ва энергетика лойиҳаларига кенг кўламда имтиёзлар ажратилаётганини кўрсатади.
