AirPods 5 арзонлашиб, Apple Watch Series 12'га сунъий интеллект қўшилди. Асосий ўзгаришлар қандай?
Apple янги қулоқчин ва ақлли соатларини тақдим этди. AirPods 5’da шовқинни фаол бостириш тизими такомиллаштирилган бўлса, Watch Series 12 атрофдаги товушларни таҳлил қилиш ва суҳбатларни қисқача мазмунда қайд этиш имкониятига эга бўлди.
Apple компанияси янги AirPods 5 қулоқчинлари ва Watch Series 12 ақлли соатларини тақдим этди. Янги қурилмаларда овоз, соғлиқ ва сунъий интеллект билан боғлиқ бир қатор функциялар янгиланган.
AirPods 5’да шовқинни бостириш кучайтирилди
AirPods 5’да шовқинни фаол бостириш (ANC) функцияси такомиллаштирилган ва энди у базавий версияда ҳам мавжуд. Компания янги тизим аввалги авлодга нисбатан 50 фоизга самаралироқ ишлашини маълум қилди.
Қулоқчинларнинг овоз сифати ҳам яхшиланган. Улар адаптив эквалайзер билан жиҳозланган бўлиб, овоз созламаларини атроф-муҳитга мослаштиради.
AirPods 5 чанг ва намликдан IP57 стандарти бўйича ҳимояланган. Шовқинни фаол бостириш функцияси ёқилган ҳолатда қулоқчинлар бир марта қувватланганда 5 соатгача ишлаши мумкин.
Янги серияда иккита версия тақдим этилган. Юқори версия босишга сезгир сенсорли оёқчалар ва симсиз қувватлашни қўллаб-қувватлайдиган ғилоф билан фарқ қилади. Базавий моделнинг ғилофи эса сим орқали қувватланади.
Apple AirPods 5 нархини оширмади. Аксинча, айрим версиялар аввалги моделларга нисбатан арзонлаштирилди. Шовқинни фаол бостириш функциясига эга версия $130, симсиз қувватлаш имкониятига эга ғилоф билан таъминланган модель эса $150 туради.
Apple Watch’да AI функциялари кенгайтирилди
Apple Watch Series 12’да асосий эътибор соғлиқ ва фитнес функциялари ҳамда сунъий интеллект имкониятларига қаратилган.
Компания Apple Watch ва iPhone’даги Health иловасини қайта ишлаб чиқди. Ундаги маълумотларни кўрсатиш тартиби ўзгартирилиб, фойдаланувчиларга шахсий тавсиялар бериш имконияти қўшилган. Шунингдек, организмнинг биологик ёшини кўрсатадиган функция ҳам пайдо бўлган.
Watch Series 12’нинг асосий янгиликларидан biri Audio Intelligence тизими бўлди. У соат микрофонлари орқали атрофдаги товушларни таҳлил қилади.
Соат суҳбатларни матнга айлантира олади
Махсус тугма босилганда қурилма атрофда содир бўлган сўнгги 15 сониядаги овозларни матн кўринишида экранга чиқариши мумкин.
Узоқ суҳбатлар учун эса Siri Recap функцияси қўлланилади. У суҳбат мазмунини қисқача умумлаштириб, натижани iPhone’даги Notes иловасига сақлайди.
Мазкур функцияларни ишлатиш учун Watch Series 12 янги S11 чипи билан жиҳозланган. Чип атрофдаги овозларни доимий равишда қайта ишлаш имконини беради.
Соатнинг ташқи ҳимояси ҳам янгиланган. Қурилмада Ceramic Shield 2 қопламасидан фойдаланилган. Watch Series 12 пўлат ва керамик корпус вариантларида ишлаб чиқарилади.
