Apple букланадиган iPhone ва iPhone 18 Pro’ни қачон тақдим этиши маълум бўлди

Apple компанияси 2026-йил 9-сентябр куни бўлиб ўтадиган тақдимотда букланадиган iPhone, шунингдек, iPhone 18 Pro ва Pro Max моделларини намойиш этишни режалаштирмоқда. Бу ҳақда «Bloomberg» шарҳловчиси Марк Гурман маълум қилди.

Унинг маълумотларига кўра, бу компаниянинг янги бош директори Жон Тернус раҳбарлигидаги биринчи тақдимоти бўлади. Тадбирда, шунингдек, Apple Watch Series 12 ва Ultra 4, AirPods 5, янги Apple TV ҳамда HomePod mini қурилмаларининг тақдимоти кутилмоқда.

iPhone 18 Pro ва Pro Max моделлари A20 Pro процессори, компаниянинг ўз C2 модеми ва такомиллаштирилган камераларга эга бўлади. Apple Watch Series 12 ва Ultra 4 янги саломатлик ҳамда спорт фаоллигини кузатиш функциялари билан жиҳозланади. Series 12 учун керамик корпус ва янги ранг вариантлари ҳам тақдим этилади.

Гурманнинг таъкидлашича, 2026-йил охири — 2027-йил бошида Apple OLED дисплейли iPad mini, iMac ва M6 чипига эга 14 дюймли MacBook Pro’ни чиқаради. Бу даврдаги асосий янгилик биринчи сенсорли MacBook бўлиши керак. Компания, шунингдек, 7 дюймли экран ва сунъий интеллект функцияларига эга Siri билан жиҳозланган ақлли уй хабини ҳам тақдим этишни режалаштирмоқда.

Манба маълумотларига кўра, 2027-йилда Apple ичига камералар ўрнатилган AirPods, дисплейсиз биринчи ақлли кўзойнакларини, iPhone’нинг 20 йиллиги муносабати билан юбилей янгиланишини, букланадиган iPhone’нинг иккинчи авлодини, шунингдек, MacBook, iPad ва Apple Watch’нинг янгиланган версияларини чиқаришни режалаштирган.

Яна узоқроқ истиқболда Apple экранга эга стол устида ишлайдиган уй роботи, сунъий интеллектга эга кулон, букланадиган iPad ва бошқа қатор қурилмаларни чиқариш имкониятини кўриб чиқмоқда.