Байден Трампни АҚШни шарманда қилаётганлигини айтди
Жо Байден Небраскадаги Демократик партия тадбирида Доналд Трампни мамлакатни «жуда қоронғу давр»га олиб кирганликда ва фақат бойлар манфаати учун ишлаётганликда айблади.
АҚШнинг собиқ президенти Жо Байден 7 ноябр куни Небраска штатида бўлиб ўтган Демократик партиянинг хайрия кечасида чиқиш қилиб, мамлакат «жуда қоронғу дамлардан ўтаётганини» таъкидлади ва амалдор президент Доналд Трампни миллатни шарманда қилганликда айблади. Бу ҳақда The New York Times хабар берди.
Байден ўз нутқида Трампни «Америкада очликни қасддан кучайтираётган» ва «Оқ уй, Конституция ҳамда қонун устуворлигига болға урган» шахс сифатида тасвирлади. Унинг сўзларига кўра, Трамп давлат бошқарувини ўз оилавий манфаатларига хизмат қилувчи тузумга айлантирган.
«Жаноб президент, сиз бизнинг хизматкоримизсиз, биз сизнинг эмас. Сиз барча америкаликлар учун ишлайсиз, фақат миллионерлар учун эмас», — деган Байден.
У Трампнинг сиёсий фаолиятини Оқ уйнинг шарқий қанотини бузиб ташлаш билан қиёслаб, «бу унинг президентлик даврининг рамзига айланди», дея таъкидлади.
Байден 2021–2025 йилларда президент лавозимини эгаллаган. Байден 2024 йил июль ойида Доналд Трамп билан бўлиб ўтган муваффақиятсиз дебатдан сўнг қайта сайланиш кампаниясини тўхтатган ва Камала Харрис номзодини қўллаб-қувватлаган эди.
Эслатиб ўтамиз, АҚШнинг собиқ президенти Жо Байден простата бези саратонидан азият чекиб, даволанишни бошлаган.
