Беҳзод Хошимов «Бизнесни ривожлантириш банки» Кузатув кенгаши аъзоси бўлди

«Бизнесни ривожлантириш банки» акциядорларининг навбатдан ташқари умумий йиғилишида Кузатув кенгаши таркиби янгиланди. 3 сентябрь куни қабул қилинган қарорга кўра, иқтисодчи Беҳзод Хошимов кенгашнинг мустақил аъзоси этиб сайланди. Қарор бўйича расмий баённома 10 сентябрда тузилган.

Хошимов билан бирга Беҳруз Зиядуллаев, Ричард Огдон ва Дэвид Найжел Клив ҳам Кузатув кенгашининг янги аъзолари сифатида тасдиқланди. Улардан Хошимов, Огдон ва Клив мустақил аъзо мақомида фаолият юритади.
Янгиланган таркибда жами 9 нафар аъзо бор. Улардан беш нафари мустақил аъзолар ҳисобланади. Кенгаш раиси лавозими Илҳом Норқуловда сақланиб қолган. Барча аъзолар уч йиллик муддатга тасдиқланган.

Кенгаш таркиби янгиланди

Йиғилишда Нодирбек Хусанов, Мансурхўжа Юсупхўжаев, Энгин Акчакоджа ва Мантас Сукевичиус кенгаш таркибидан чиқарилди. Уларнинг ўрнига юқоридаги тўрт нафар номзод киритилди.

Янги таркибда давлат вакиллари Илҳом Норқулов, Тимур Хусанов, Беҳруз Зиядуллаев ва Зумрат Ибрахимжановадан иборат. Мустақил аъзолар сифатида Саидкамол Ходжаев, Бруно Балванера, Беҳзод Хошимов, Ричард Огдон ва Дэвид Найжел Клив тасдиқланган.
Расмий маълумотга кўра, Хошимов Абу-Дабидаги Нью-Йорк университетида ассистент-профессор бўлиб ишлайди. Унинг мазкур ташкилотдаги лавозими корпоратив маълумотлар базасида ҳам кўрсатилган.

Хошимовнинг янги вазифаси

Беҳзод Хошимов тадбиркорлик ва венчур капитали бўйича тадқиқотлар олиб боради. Унинг «Бизнесни ривожлантириш банки» Кузатув кенгашига кириши банкнинг бошқарув тузилмасида мустақил директорлар улушини оширди.

Янги аъзоларнинг вазифага киришиши учун Марказий банк билан келишув талаб этилади. Расмий ҳужжатда Хошимов, Ричард Огдон ва Дэвид Кливнинг кенгашдаги фаолияти Марказий банк билан келишилгандан сўнг бошланиши қайд этилган.

Банкнинг янги Кузатув кенгаши таркиби расман 11 сентябрда корпоратив ахборот порталига жойлаштирилган. Ҳужжатда банкнинг бошқарув тузилмаси ва ҳар бир аъзонинг иш жойи ҳамда лавозими ҳақидаги маълумотлар келтирилган.

Беҳзод Хошимов 1993 йилда Тошкентда туғилган. У Сингапурнинг Наньянг технология университетида амалий математика бўйича бакалавр даражасини олган, кейин Висконсин–Мэдисон университетида иқтисодиёт бўйича магистратура ва бизнес бўйича PhD дастурини тамомлаган. 2024 йилдан Абу-Дабидаги Нью-Йорк университетида бизнес, ташкилотлар ва жамият йўналиши бўйича ассистент-профессор бўлиб ишлайди. Унинг асосий тадқиқот йўналишлари тадбиркорлик ва венчур капиталига қаратилган. Хошимов 2020 йилдан банк секторидаги корпоратив бошқарувга жалб қилинган.