АҚШ элчилари Путин билан музокараларда ҳеч қандай натижага эришмади

Доналд Трампнинг махсус вакиллари Москвага келганига қарамай, тинчликка эришиш борасида сезиларли натижа бўлмади. Аксинча, Россия қиш давомида Украинага ҳужумларни кучайтиришни режалаштирмоқда. «Bloomberg» манбаларига кўра, Москва Украинанинг қаршилик кўрсатиш қобилиятини ва Киев иттифоқчиларининг унга ёрдам беришга қанчалик тайёр эканини синаб кўрмоқчи.

Агентлик суҳбатдошларидан бирининг айтишича, яқин олти ой ичида Россия Украинадаги электр энергияси ва иситиш инфратузилмасига зарбаларни кучайтириши мумкин. Мақсад — қишда аҳоли учун ҳаёт шароитларини янада оғирлаштириш. Шу билан бирга, Россия Европада гибрид ҳужумлар ва сиёсий аралашувларни ҳам кучайтириб, Украинага бўлган қўллаб-қувватлашни сусайтиришга ҳаракат қилиши мумкин.

«Bloomberg» манбаларидан бирига кўра, Владимир Путин 2027-йил баҳорга бориб Россия учун ҳозиргидан ҳам кучлироқ позиция яратишга умид қилмоқда. Яна бир манба эса жиддий тинчлик музокаралари келаси йилгача бошланиши эҳтимоли жуда пастлигини айтган.

Агентлик манбаларининг таъкидлашича, Путин ўз позициясини юмшатгани ҳақида ҳозирча ҳеч қандай белги кўрсатмаган. Бу АҚШ томонидан тинчлик музокараларини қайта бошлаш учун янги таклифлар зарурлиги ҳақидаги сўнгги сигналларга қарамай содир бўлмоқда.

Трампнинг махсус вакиллари Стив Уиткофф ва Жаред Кушнер 5-сентябр куни Москвага бориб, Владимир Путин билан учрашган. 6-сентябрда, улар Киевга борган. «Financial Times» манбаларига кўра, Киевдаги музокараларда томонлар уруш қишгача тугаши эҳтимоли паст эканини умумий равишда тан олган. Уиткофф ва Кушнер, жумладан, Украинага оғир қиш даврини енгиб ўтишда қандай ёрдам бериш мумкинлигини ҳам муҳокама қилган.

Уиткофф ва Кушнер Москва ва Киевга борган пайтда Путин Киевга зарбаларни уч кунга тўхтатиш ҳақида буйруқ берган. Зеленский эса ўз навбатида Украина «Россия ҳаво ҳудудининг нормал ишлашини таъминлашини, америкалик музокарачилар хавфсиз келиши учун шароит яратишини» ваъда қилган.

Бироқ 8-сентябр куни Россия Киевга ҳужумларни яна қайта бошлаган.

Суҳбатдошлардан бирининг айтишича, Путин Америка элчиларининг ташрифидан 18-20-сентябр кунлари бўлиб ўтадиган Россия Давлат Думасига парламент сайлови олдидан мамлакат ичкарисида куч намойиш этиш учун фойдаланган.

«У Америка делегациясини Кремлда учрашишдан олдин кечгача кутишга мажбур қилди, шу сабабли Уиткофф ва Кушнер Путиннинг элчиси Кирилл Дмитриев билан Москва марказидаги қимматбаҳо ресторанда бир неча соатлик тушлик қилишга мажбур бўлишди», — деб қўшимча қилди суҳбатдош.

«Bloomberg» манбаларининг таъкидлашича, АҚШ, Россия ва Украина вакиллари ўртасидаги уч томонлама музокаралар Давлат Думасига сайловдан кейин қайта бошланиши мумкин, гарчи бундай муҳокамалар тинчлик битими тузиш жараёнига «сезиларли таъсир кўрсатиши эҳтимолдан йироқ».